ބްރޮޑްކާސްޓިން ކޮމިޝަންގެ މެމްބަރުކަމުން ވަކިކުރުމުގެ ކުރިން ޖަވާބުދާރީ ވާން ފުރުސަތެއް ދޭން ބުދަ ދުވަހު މިނިވަން މުއްސަސާތަކާ ބެހޭ ކޮމިޓީން ނިންމާފައި ވަނިކޮށް އެ ކޮމިޝަންގެ މެމްބަރުކަމުން އިސްމާއިލް ސޮފްވާން އިސްތިއުފާ ދެއްވައިފިއެވެ.
އަންގާރަ ދުވަހު މަޖލީހުގެ ރައީސް މުހައްމަދު ނަޝީދަށް ފޮނުވި ސިޓީއެއްގައި ސޮފްވާން ވިދާޅުވީ، އޭނާ އިސްތިއުފާ ދެއްވަން ނިންމެވީ ދިގުމުއްދަތަކަށް ސިއްހީ ފަރުވާއެއް ކުރަން ޖެހުމުގެ ސަބަބުން މަގާމުގެ މަސްއޫލިއްޔަތު އަދާކުރަން އުޒުރެވެރިވުމުން ކަމަށެވެ.
އޭގެ އިތުރުން ސޮފްވާން ވިދާޅުވީ އެ ކޮމިޝަންގެ އެއްވެސް މެމްބަރަކަށް އެއްވެސް ބާވަތެއްގެ ނުފޫޒެއް ފޯރުވާފައި ނުވާނެ ކަމަށެވެ. އަދި ކޮމިޝަންގެ ރިޔާސަތާއި ހަވާލުވެ އަމިއްލަ މަސްލަހަތު އެއްވެސް ކަމެއްގައި އިސްކޮށްފައި ނުވާނެ ކަމަށް ވެސް އޭނާ ވިދާޅުވިއެވެ. ސޮފްވާން މިހެން ވިދާޅުވެފައި ވަނީ، މިދިޔަ ހަފުތާގެ ތެރޭގައި މިނިވަން މުއައްސަސާތަކާ ބެހޭ ކޮމިޓީގައި ސޮފްވާންގެ ފަރާތުން ވަކިގޮތަކަށް ކަންކަން ނިންމަން ނުފޫޒު ފޯރުވަން މަސައްކަތް ކޮށްފައިވާ ކަމަށް ބްރޯޑްކޮމްގެ ރައީސް މުހައްމަދު ޝަހީބު ވިދާޅުވެފައި ވަނިކޮށެވެ.
ސޮފްވާން ވަނީ އޭނާގެ އޮފީހަށް ހާޒިރު ނުވާ ސަބަބު ސާފު ކުރަން ކޮމިޝަނުން މަސައްކަތް ކޮށްފައި ނުވާ ކަމަށާއި އެ މުއްދަތުގެ ތެރޭގައި ސަލާން ފޮނުވާފައިވާ ކަމަށް ވެސް ވިދާޅުވެފައެވެ. އަދި ނައިބު ރައީސްގެ މަގާމުން އިސްތިއުފާ ދެއްވީ ވެސް އެ މަގާމާ ދޭތެރޭ ކޮމިޝަނުން ގޮތެއް ނިންމަން ނުކުޅެދުމުން ކަމަށް ވެސް އޭނާ ވިދާޅުވިއެވެ.
ސޮފްވާން ނިމިދިޔަ ރިޔާސީ އިންތިހާބަށް ފަހު އޮފީހަށް ނިކުމެ ވަޑައިނުގެންނެވި ނަމަވެސް، އޭނާ ވަނީ ބަރާބަރަށް މުސާރަ ނަންގަވާފައެވެ.
