ޚާރިޖީ ވަޒީރު އަބްދުﷲ ޝާހިދު ރަޝިޔާއަށް ފުރާވަޑައިގަންނަވައިފިއެވެ.
މިނިސްޓަރީގެ ވެބްސައިޓްގައި ހާމަކޮށްފައި ވަނީ ރަޝިޔާ އަށް ކުރައްވާ މި ދަތުރުފުޅަކީ ދެ ގައުމުގެ ގުޅުމާ ބެހޭ ގޮތުން މަޝްވަރާކޮށް، ގުޅުން ބަދަހި ކުރުމަށް ކުރެވޭ ދަތުރުފުޅެއް ކަމަށެވެ. ދެ ގައުމުގެ ޚާރިޖީ ގުޅުމާ ބެހޭ ގޮތުން މަޝްވަރާކުރެއްވުމަށް ކުރައްވާ މި ދަތުރުފުޅުގައި ރަޝިޔާގެ ފޮރިން މިނިސްޓަރ ސާރގޭ ލަވްރޯފްއާ ވެސް މިނިސްޓަރ ޝާހިދު ބައްދަލުކުރައްވާނެއެވެ.
މި ދަތުރުފުޅުގައި ރަޝިޔާ އާއި ރާއްޖޭގެ ގުޅުން ބަދަހިކޮށް އެއްބަސްވުންތަކެއްގައި ސޮއިކުރެވޭނެ ކަމަށް ވެސް ފޮރިން މިނިސްޓްރީގެ ވެބްސައިޓުގައި ހާމަކޮށްފައި ވެއެވެ.
ފޮރިން މިނިސްޓްރީން ބުނީ މި އެއްބަސްވުމުގެ ދަށުން ދިވެހިންނަށް ރަޝިޔާ އިން އޮން އެރައިވަލް ވިސާ ލިބޭނެ ކަމަށެވެ. އަދި ރަޝިޔާގެ ރައްޔިތުންނަށް ވެސް އެ ފަސޭހަ ލިބިގެންދާނެ ކަމަށް ފޮރިން މިނިސްޓްރީން ބުންޏެވެ. މި އެއްބަސްވުމުގެ ދަށުން ލިބޭނީ 90 ދުވަހުގެ ވިސާއެކެވެ.
މިނިސްޓަރ އޮފް ސްޓޭޓް ފޮރ ފޮރިން އެފެއާޒް އަހްމަދު ޚަލީލް އާއި، ރާއްޖެއިން ޖަރުމަނަށް ކަނޑައަޅުއްވާފައި ހުންނަވާ ސަފީރު އަހުމަދު ލަތީފް އާއި މިނިސްޓްރީގެ ބައެއް އެހެން އޮފިޝަލުން ވެސް މި ދަތުރުފުޅުގައި ބައިވެރިވެ ވަޑައިގަންނަވައެވެ.
