ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ދަޢުވަތަކަށް އިންޑިއާގެ ބޮޑުވަޒީރު ނަރެންދުރަ މޯދީ، ރާއްޖެއަށް ކުރެއްވި ދެ ދުވަހުގެ ދަތުރުފުޅު ނިންމަވާލެއްވުމަށް ފަހު މިއަދު ހެނދުނު ފުރާވަޑައިގެންފިއެވެ.
މޯދީ ރާއްޖެއަށް ކުރެއްވި ދަތުރުފުޅަކީ އިންޑިއާގެ ބޮޑުވަޒީރުކަމުގެ ދެވަނަ ދައުރަކަށް އެމަނިކުފާނު ހޮވި ވަޑައިގެންނެވި ފަހުން ބޭރުގެ ޤައުމަކަށް ކުރެއްވި ފުރަތަމަ ދަތުރުފުޅެވެ. "ނެއިބަހުޑް ފަސްޓް" ގެ ޝިއާރުގައި ރާއްޖެއަށް ކުރެއްވި ދަތުރުފުޅަށް ފަހު މޯދީ ދެން ވަޑައިގަންނަވާނީ ސްރީލަންކާއަށެވެ.
ބޮޑުވަޒީރު މޯދީގެ މި ދަތުރުފުޅުގައި، އެ މަނިކުފާނަށް ރާއްޖެ އިން ވަނީ ރަސްމީ ގޮތުން މަރުޙަބާ ދަންނަވާފައެވެ. އަދި މި ދަތުރުފުޅުގެ ބައެއްގެ ގޮތުން ދެ ޤައުމުގެ ދެމެދުގައި ރަސްމީ ވާހަކަތައް ބާއްވާ، ދެ ޤައުމުގެ ދެމެދުގައި ގުޅުން ބަދަހިކުރުމުގެ އެއްބަސްވުންތަކެއް ވަނީ ބަދަލުކުރައްވާފައެވެ.
ރާއްޖެއަށް ކުރެއްވި މި ދަތުރުފުޅުގައި މޯދީ ވަނީ ރައްޔިތުންގެ މަޖިލީހުގައި ތަގުރީރު ވެސް ކުރައްވާފައެވެ. އަދި ދިވެހި ސަރުކާރުން ވަނީ އެމަނިކުފާނަށް ނިޝާން އިއްޒުއްދީންގެ ލަގަބު ވެސް އަރުވާފައެވެ. އެއީ ރާއްޖޭގެ އެންމެ މަތީ ލަގަބެވެ.
މޯދީގެ މި ދަތުރުފުޅުގައި ދިވެހިރާއްޖެއާ އިންޑިއާއާ ދެމެދު ވަނީ ހަ އެއްބަސްވުމެއްގައި ސޮއި ވެސް ކޮށްފައެވެ.
