އީމާންކަން ހަރުދަނާ ކުރުމަށް ހުކުރު ހުތުބާގައި ގޮވާލައިފިއެވެ.
"އީމަންކަން ހަރުދަނާ ކުރުން" މި މައުލޫގެ މައްޗަށް ބިނާކޮށްފައިވާ ހުތުބާގައި ބުނީ އީމާން ކަމަކީ އިސްލާމްދީނުގެ އަސާސް ކަމުން ދުންޔަވީ ހަޔާތުގެ އުފަލާއި އަރާމާއި، އާހިރަތުގެ ބާއްޖަވެރިކަން ލިބޭނީ އީމާންކަން ވަރުގަދަ ކޮށް، ހަރުދަނާ ކޮށްގެން ކަމަށެވެ.
"މާއްދިއްޔަތުގެ ތެރެއަށް ގޮސް ހުސްވެފައިވާ، މިފަދަ ދުވަސްވަރެއްގައި އީމާންކަން ބަލިކަށިވެ ނުބައިމަގުން ދެވުމަކީ ވަރަށް ގާތް ކަމެކެވެ. އަދި މީހާގެ އުޅުމާއި އަމަލުތަކުގެ ސަބަބުންވެސް އީމާންކަން ބަލިކަށި ވެގެން ދެއެވެ."
މީގެ އިތުރުން، އީމަންކަމަކީ ހިތުގައި ސާބިތުވެފައިވާ ވަރުގަދަ އަގީދާއެއް ކަމަށާއި އެއްވެސް ފަރާތަކަށް އެއަށް ބަދަލު ނުގެނެވޭނެ ފަދަ ގޮތަކަށް އެމީހެއްގެ ހިތުގައި ބިންވަޅު ނެގިފައިވާ ޔަގީންކަމެއް ކަމަށް ހުތުބާގައި ބުނެދީފައިވެއެވެ. އަދި އެއީ އެމީހަކު ތެދުކޮށް ގަބޫލުކޮށްފައިވާ ކަށަވަރުކުރުމެއް ކަމަށާއި އިސްލާމްދީނުގެ އަސާސް ކަމުގައި ބިނާވެފައިވަނީ އެ ތެދުކުރުން ކަމުގައި ހުތުބާގައި ފާހަގަކުރިއެވެ.
އަޅުގަނޑުމެންގެ މުޖުތަމައުގައި ބޮޑެތި ކުށްތަކައް އަރައިގަންނަ މިންވަރު މިހާރު އިންތިހާއަށް އިތުރުވެފައިވާކަން ހުތުބާގައި ފާހަގަކޮށްފައިވެއެވެ.
"އަޅުގަނޑުމެންގެ މުޖުތަމައު އިސްލާހުކޮށް، މަސްތުވަތަކެތި ބޭނުންކުރުން ފަދަ ބޮޑެތި ޖަރީމާތަކުންނާއި ފާހިޝް އަމަލުތަކުން މުޖުތަމައު ސަލާމަތް ކުރެވޭނީ އަގީދާ އާއި އީމާންކަން ވަރުގަދަކޮށް ﷲ އަށް ފުރިހަމައަށް އީމާންވެ، ޣައިބުގައިވާ އެންމެހައި ކަންތައްތަކަށް ފުރިހަމަ މާނާގައި އީމަންވެގެންނެވެ. މާތް ﷲ ހަޟްރަތަށް ރުޖޫއަވެ، އަޅާއާ އެކަލާނގެ ދެމެދުގައި އޮންނަ ގުޅުން ވަރުގަދަ ކުރެވިގެންނެވެ."
އޭގެ އިތުރުން، އަޅުގަނޑުމެންގެ ބަލިކަށިވެފައިވާ އަގީދާއާއި އީމާންކަން ވަރުގަދަކުރެވި، އަޅުކަމުގެ ހަގީގީ ރާހަތާއި ފޮނިކަން އިހުސާސްކުރެވޭނީ މާތް ﷲ ގެ ހަޟްރަތައް ރުޖޫއަވެގެން ކަމަށާއި ކީރިތި ގުރުއާން ކިޔަވައި އޭގެ އާޔްތަތަކާމެދު ވިސްނައި ފިކުރު ހިންގުމުން ކަމަށް ހުތުބާގައި ބުނެދިނެވެ.
"ކީރިތި ގުރުއާނުގައި އީމަންކަމުގެ ވައުދާއި ވައީދުގެ ބަސްފުޅުތަކާއި ހުކުމްތަކާއި އިސްވެ ގޮސްފައިވާ މީހުންގެ ހަބަރުތަކާއި އަދަބާއި ރިވެތި އަހުލާގުގެ ވާހަކަތައް ވެއެވެ. އެއީ ގުރުއާން ކިޔަވާހިނދު ފުންކޮށް ވިސްނައި ތަދއްބުރުކުރާ މީހަކަށެވެ. މިކަމަކީ އީމާންކަން ހަރުދަނާ ކުރުމުގެ އެންމެ މުހިއްމު އެއް ވަސީލަތެވެ. ކީރިތި ގުރުއާން ކިޔަވާ ހިނދު އޭގެ އާޔަތްތަކާ މެދު ވިސްނާ ފިކުރު ކުރުމަކީ އީމާންކަން ހަރުދަނާ ވެގެންދާނެ ކަމެކެވެ."
އަދި ގައުމުގެ ކުރިމަގު ބިނާކުރަން ތިބި ބަޔަކީ ޒުވާނުން ކަމަށްވެފައި މިހާރު ބައެއް ޒުވާނުންނަކީ ދީނާއި ދުރު، ރިވެތި އަހުލަގީ ސިފަތަކަށް ބީރައްޓެހިވެފައިވާ ބައެއް ކަމަށާއި އެހެންކަމުން ހުރިހާ ކަމެއްވެސް ބައްޓަން ކުރަންވާނީ އިސްލާމްދީނުގެ ހަމަތަކާއި އެއްގޮތަށް ކަމަށާއި ތައުލީމީ މަންހަޖުގައި ހުރި އަގީދާއާއި އީމާންކަމުގެ ބައިތަކާއި ވާހަކަތައް ފުރިހަމައަށް ތަންފީޒު ކުރަން ޖެހޭކަން ހުތިބާގައި ހަނދާން ކޮށްދީފައިވެއެވެ.
