މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތްތަކުގެ ތެރެއިން ޖޫން ފަސް ވަނަ ދުވަހު މާލޭގައި ފުލުހުން ހިންގި އޮޕަރޭޝަނެއްގައި މާފަންނުގައި ހުރި ގެއަކުން، މަސްތުވަތަކެއްޗާ އެކު ފަސް މީހަކު ހައްޔަރު ކޮށްފިއެވެ.

މަސްތުވާތަކެއްޗާ އެކު މި ފަސް މީހުން ހައްޔަރު ކޮށްފައި ވަނީ މ. ފެޝަންމީޑު ކިޔާ ގެއެއް ބަލާ ފާސްކުރި ކުރުމުގައެވެ.

މި މައްސަލައާ ގުޅިގެން ހައްޔަރުކޮށްފައި ވަނީ 21 އަހަރުގެ ދެ ފިރިހެނުންނާއި 19 އަހަރުގެ ފިރިހެނެއްގެ އިތުރުން 47 އަހަރުގެ ފިރިހެނަކާއި 33 އަހަރުގެ ފިރިހެނެއް ކަމަށް ފުލުހުންގެ މީޑިއާ އޮފިޝަލް ވިދާޅުވެފައި ވެއެވެ. އަދި އެ ފަސް މީހުންނަކީ ދިވެހިން ކަމަށް ވެސް މީޑީއާ އޮފިޝަލް މައުލޫމާތު ދީފައި ވެއެވެ.

މީގެ އިތުރުން، އެ ގެ ބަލާ ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް އަޅާފައި ހުރި 11 ރަބަރު ޕެކެޓާއި ހަތަރު ސެލޯފިންކޮޅު ފެނިފައިވާ ކަމަށާއި އެ ގެއަކީ ފުޅާ ދާއިރާއެއްގައި މަސްތުވާތަކެތީގެ ވިޔަފާރިކޮށް އޭގެ ބޭނުން ކުރެވޭނެ ގޮތަށް ހަމަޖައްސާފައިވާ ގެއެއް ކަމަށް އޮފިޝަލް ވިދާޅުވެފައި ވެއެވެ.

މީޑީއާ އޮފިޝަލް ވިދާޅުވި ގޮތުގައި އެ ގެއަކީ ފުލުހުންނަށް ނުވަދެވޭ ގޮތަށް ދަގަނޑު ދޮރު ހަރުކޮށްފައިވާ ގެއެއް ކަމަށާއި އެގޭގެ ދޮރު ކައިރީ ސެކިއުރިޓީ ބެލެހެއްޓުމަށް މީހަކު ބަހައްޓާފައި ހުރެއެވެ. އަދި އެ ގޭ ތެރޭގައި ފުލުހުންނަށް ނިސްބަތްކޮށް ތަފާތު ހަޑިހުތުރު ލިޔުންތައް ލިޔެފައި ހުރިކަން ވެސް އޮފިޝަލް ފާހަގަކުރެއްވިއެވެ.

މަސްތުވާތަކެތި ބޭނުންކުރުމާއި އޭގެ ވިޔަފާރި ކުރުމަކީ ރާއްޖޭގައި ވަރަށް ގިނަވެފައިވާ މައްސަލައެކެވެ.