އިންޑިއާގެ އެންމެ އިސް ފަނޑިޔާރު, ރަންޖަން ގޯގޮއިގެ މައްޗަށް އެ ކޯޓުގެ ކުރީގެ މުވައްޒަފަކު ކުރި ޖިންސީ ގޯނާގެ ތުހުމަތުތަކުން އެމަނިކުފާނު ސަލާމަތްވެ ވަޑައިގެންފިއެވެ.

މައްސަލަ ތަހުގީގުކުރި ޕެނަލުން ހޯމަ ދުވަހު ނިންމާފައިވަނީ އެ ތުހުމަތުތަކަކީ އެއްވެސް އަސްލެއް ނެތް ތުހުމަތުތަކެއް ކަމަށެވެ. މައްސަލައިގެ ތަހުގީގު ރިޕޯޓް އާއްމު ނުކުރުމަށް ޕެނަލުން ވަނީ ނިންމާފައެވެ.

ޕެނަލްގެ ނިންމުން އައިސްފައިމިވަނީ އެ ޕެނަލްގެ ނިންމުން އިންސާފުވެރިވެދާނެކަމާމެދު ސުވާލު އުފައްދައި، މައްސަލަ ހުށަހެޅިފަރާތުން އެ މައްސަލަ އަނބުރާ ނެގިފަހުންނެވެ.

ސުޕްރީމް ކޯޓުގެ 22 ފަނޑިޔާރުންނަށް އޭޕްރީލް މަހުގެ 19 ވަނަ ދުވަހު ފޮނުވާފައިވާ ސިޓީގައި ބުނެފައިވާ ގޮތުން މިދިޔަ އަހަރުގެ އޮކްޓޯބަރު މަހުގެ ތެރޭގައި ފަނޑިޔާރުވަނީ ފަނޑިޔާރުގެ ރަސްމީ ގެކޮޅުގެ އޮފީހުގައި އަންހެން މީހާގެ ފަރާތުން ޖިންސީ އުފާ ހޯދުމަށް ދެ ފަހަރެއްގެ މަތިން އުޅެފައެވެ.

"އޭނާ ވަނީ އުނަގަނޑުގައި ބައްދާލައި މުޅިގައިގައި އޭނާގެ އަތުން ފިރުމާފައި، އަދި އޭނާގެ ހަށިގަނޑުން އަހަރެން ފިއްތާލައި އަހަރެން ދިޔަ ނުދީފައި" ހުވާކޮށް އޭނާ ލިޔެފައިވާ ބަޔާނުގައިވެއެވެ.

އަންހެން މީހާ ބުނާގޮތުން ފަނޑިޔާރުގެ ނަގަން އުޅުނު ފައިދާތަކަށް އޭނާ ނޫނެކޭ ބުނުމާއެކު ވަޒީފާއިން ވަކިކޮށް އާއިލާއަށް ވެސް ފުރައްސާރަ ކޮށްފައިވެއެވެ.

މީގެ އިތުރުން ގޯގޮއިގެ އަނބިކަނބަލުންގެ ގާތަށް އޭނާ ހާޒިރު ކުރުމަށް ފަހު އޭނާގެ ކުރިމައްޗަށް ގުދުވެ ނޭފަތުން ފަނޑިޔާރުގެ އަނބިކަނބަލުންގެ ފައިންޕުޅުގައި ބޮސްދީ މައާފަށް އެދުމަށް އެންގުނު ކަމަށް ވެސް ބުނެފައިވެއެވެ.

ހުށަހެޅި މައްސަލައާއެކު ސުޕްރީމް ކޯޓުންވަނީ އެ މައްސަލަ ބެލުމަށް އެ ކޯޓުގެ ދެ އަންހެން ފަނޑިޔާރަކު ހިމެނިވަޑައިގަންނަވާގޮތަށް ތިން ފަޑިޔާރުންގެ ބެންޗެއް އެކުލަވާލާފައެވެ.

ސުޕްރީމް ކޯޓުގެ ފަނޑިޔާރެއް ކަމަށްވާ އިންދިރާ ޖައިސިންގ ވަނީ ހޯމަ ދުވަހު ނިންމެވި ނިންމެވުމަކީ އޮޅުވާލުމެއް ކަމަށް ތުހުމަތު ކުރައްވައި އެ މައްސަލައިގެ ރިޕޯޓް އާއްމުކުރުމަށް ގޮވާލައްވާފައެވެ.

https://twitter.com/IJaising/status/1125367764921667585

އިސް ފަނޑިޔާރު، އުމުރުފުޅުން 64 އަހަރު ފުޅުގެ ރަނަޖްން ގޯގޮއި ވަނީ 35 އަހަރުގެ އަންހެން މީހާ ކުރާ ތުހުމަތަކީ ގަބޫލު ކުރައްވަން ދަތި އަދި އެ ކަމަކީ އެ މަނިކުފާނު މުހިއްމު އަޑުއެހުންތައް ހުއްޓުވުމަށް ކޮށްފައިވާ ކަމެއް ކަމަށް ވިދާޅުވެފައެވެ.