މެކްސިކޯގެ ފަރުބަދަމަތީ ސަރަހައްދަކަށް ޕްރައިވެޓް ޖެޓެއް ވެއްޓި، އޭގެން ދަތުރުކުރި 13 މީހުންގެ ފުރާނަ ގެއްލިއްޖެއެވެ.
މި ހާދިސާގައި މަރުވީ މީހުންގެ ތެރޭގައި، އެމެރިކާގެ ލަސް ވޭގަސްއަށް ބޮކްސިން މެޗެއް ބަލަން ދިޔަ ފަސް މީހުންގެ އާއިލާއެއް ވެސް ހިމެނެއެވެ. ފްލައިޓް ދަތުރުކުރަމުން ދިޔައީ ލަސް ވޭގަސްއިން މެކްސިކޯގެ މޮންޓެރޭއަށް ދަތުރުކުރުމަށެވެ.
ފްލައިޓް ފެނިފައިވަނީ ފްލައިޓް ރާޑަރުން ގެއްލުމާއި ގުޅިގެން އޭތި ހޯދުމުގެ މަސައްކަތް އޭރިއަލް ސަވައިލެންސް ބޭނުންކޮށްގެން ކުރަމުން ގެންދަނިކޮށެވެ. ފެނުނު ސަރަހައްދުގައި އެއްވެސް މީހަކު ސަލާމަތުން ނެތްކަން އޭތި ވެއްޓުނު އޮކަމްޕޯ އަވަށުގެ އޮފިޝަލުން ވެސް ވަނީ މައުލޫމާތު ދީފައެވެ. އަދި އެ ގައުމުގެ ޓްރާންސްޕޯޓް މިނިސްޓަރު ވެސް ވަނީ މި ވާހަކަތައް ކަށަވަރުކޮށްދެއްވާފައެވެ.
ފްލައިޓް ވެއްޓުނު ސަރަހައްދަކީ މީހުން ނުޅޭ ސަރަހައްދަކަށް ވުމާ އެކު، އެ ހިސާބަށް ފޯރުމުގައި ވެސް ދަތިތަކެއް އެބަހުރި ކަމަށް ކުއްލި ހާލަތުގައި ސަލާމަތްކުރަން މަސައްކަތްކުރާ ފަރާތްތަކުން ވަނީ މީޑިއާތަކަށް މައުލޫމާތު ދީފައެވެ. ފްލައިޓް ވެއްޓެން ދިމާވި ސަބަބު ދެނިވިފައި ނެތައް، މެކްސިކޯގެ ބައެއް މީޑިއާތަކުން ރިޕޯޓްކޮށްފައިވަނީ ފްލައިޓް ވެއްޓެން މެދުވެރިވީ ތޫފާނަކުން ސަލާމަތްވުމުގެ ގޮތުން ފްލައިޓް ތިރިކުރަން އުޅުމުގެ ތެރޭގައި ކަމަށެވެ.
ވެއްޓިފައިވަނީ ބޮމްބަރޑިއަރ ޗެލެންޖަރ 601 މަރުކާގެ ޖެޓެކެވެ. ޖެޓް ވެއްޓުމާ ގުޅިގެން ބޮމްބާޑިއާއިން ނެރުނު ބަޔާނެއްގައި ވަނީ މަރުވި މީހުންގެ އާއިލާތަކަށް ތައުޒިޔާ ފޮނުވުމަށާއި ތަހުގީގުކުރާ ފަރާތްތަކަށް ފުރިހަމަ އެއްބާރުލުން ދޭނެ ކަމުގެ ޔަގީންކަން އަރުވާފައެވެ.
