ރާއްޖޭގައި ހުޅުވި ދަ ކެލޮރީ ކައުންޓަރ އައުޓްލެޓް ބަންދުކޮށްފިއެވެ.
ދަ ކެލޮރީ ކައުންޓަރގެ މާލެ އައުޓްލެޓްގެ ވެރިޔާ މުހައްމަދު އިންފާޒް ފާއިޒް ވިދާޅުވީ ކެލޮރީ ކައުންޓަރ ބަންދުކޮށްފައި ވަނީ އާންމުންގެ ފަރާތުން ހީކުރި ވަރަށް ތަރުހީބު ނުލިބުމުން ކަމަށާއި އެކަމުގެ އަސަރު ވިޔަފާރިއަށް ވެސް ކޮށްފައިވާ ކަމަށެވެ.
ކެލޮރީ ކައުންޓަރ އައުޓްލެޓުން ހިދުމަތްދީފައި ވަނީ އެންމެ ފަހުން މެއި މަހުގެ 5 ވަނަ ދުވަހެވެ.
މި އައުޓްލެޓަކީ ސިއްހަތަށް ފައިދާ ހުރި މީރު ކެއުންތަކާއި ބުއިންތައް ލިބިގެންދާ އައުޓްލެޓެކެވެ. އެގޮތުން ކަސްރަތު ކުރުމުގެ ކުރިންނާއި ފަހުން ކާންޖެހޭ އެއްޗެއްސާއި ޗިކަން ރެޕްސް އަދި ސިއްހަތަށް ފައިދާ ހުރި އެކި ބުއިންތައް މި ތަނުން ލިބެން ހުރެއެވެ.
ދަ ކެލޮރީ ކައުންޓަރގެ ފްރެންޗައިޒް އައުޓްލެޓެއް ކުވައިތްގެ އިތުރުން ސްރީލަންކާގައި ވެސް ހުރެއެވެ.
މި އައުޓްލެޓް ރާއްޖޭގައި ހުޅުވާފައި ވަނީ މިދިޔަ އަހަރުގެ މާރޗް މަހުގެ 7 ވަނަ ދުވަހުއެވެ.
