ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ކުރިމަތިލާފައިވާ ކެންޑިޑޭޓުންގެ ތެރެއިން ނަން ނަން އަނބުރާ ގެންދިޔުމަށް ހުށަހަޅާ ކެނޑިޑޭޓުންގެ ނަން ނަގައިދެވޭނީ އިލެކްޝަންސް ކަމިޝަނުން ވޯޓު ކަރުދާސް ޕްރިންޓް ކުރުމުގެ ކުރިން ކަމަށް އެ ކަމިޝަނުން ބުނެފިއެވެ. 

އެ ކޮމިޝަންގެ މެމްބަރު އަހުމަދު އަކްރަމް ވިދާޅުވީ ބައެއް ކެންޑިޑޭޓުންގެ ނަން އަނބުރާ ނަގާފައިވާތީ އިންތިޚާބުގައި ވާދަކުރަން މިހާރު ތިބީ 386 ކެންޑިޑޭޓުން ކަމަށެވެ. ވޯޓް ކަރުދާސް ޕްރިންޓް ކުރުމަށް ދޭނެ ބަޔަކު އަންގާރަ ދުވަހުގެ ހަވީރު ކަނޑައަޅާނެކަމަށް އޭނާ ވިދާޅުވިއެވެ.

"އީސީއިން އިއުލާން ކޮށްފައި އޮންނާނީ ކެންޑިޑޭޓުންނަށް ނަން ނެގޭނީ ގުރުއަތު ލާ ވަގުތާއި ހަމައަށް ކަމަށް. ގަވައިދުގައި އިންނަ ގޮތުން ކަމިޝަނުން ޑިސައިޑް ކުރާނީ އެކަން. އެގޮތުން ކަމިޝަނުން ނިންމީ ނަން ނަގައިދޭނީ ވޯޓު ކަރުދާސް ޕްރިންޓަށް ދިނުމުގެ ކުރިން ކަމަށް." އަކްރަމް ވިދާޅުވިއެވެ.

މަޖިލިސް އިންތިޚާބަށް ކުރިމަތިލާފައިވާ ފަރާތްތަކުން މިހާރު ނަން ނަގާފައިވަނީ މަހިބަދޫ ދާއިރާއަށް އެމް.ޑީ.ޕީ އިން ކުރިމަތިލި، ޢަލީ އަޙްމަދާއި އައްޑޫ ސިޓީ ހިތަދޫ މެދު ދާއިރާއަށް ވާދަކުރެއްވި ޒާހިދު ރަމީޒްއެވެ. އޭގެއިތުރުން ލޭބަރ ޕާޓީގެ ފަރާތުން ގެމަނަފުށީ ދާއިރާ އަށް ވާދަކުރާ މުހައްމަދު އިލްހާމެވެ.

އަކްރަމް ވިދާޅުވީ ނަން ނެގި ކަމުގައި ވިއަސް ފޯމާއި އެކު ދެއްކި އިދާރީ ފީ އަނބުރާ ނުލިބޭނެ ކަމަށެވެ. 

ރައްޔިތުންގެ މަޖިލީހުގެ އިންތިޚާބަށް ކުރިމަތިލާ މީހުން ދައްކަންޖެހޭ ޑިޕޮޒިޓްގެ ފައިސާގެ ޢަދަދަކީ 5000ރ. (ފަސްހާސް ރުފިޔާ) އެވެ.

މިފަހަރުގެ މަޖިލިސް އިންތިޚާބުގައި 389 މީހުން ފޯމު ލާފައިވާއިރު އިދާރީ ފީގެ ގޮތުގައި އެ ކަމިޝަނަށް 1،945،000ރ. (އެއް މިލިއަން ނުވަލައްކަ ސާލީސް ފަސްހާސް ރުފިޔާ) ލިބޭނެއެވެ. 

ކުރިއަށް އޮތް މަޖިލިސް އިންތިހާބުގައި 264،589 މީހުން ވޯޓުލުމުގެ ހައްގު ލިބިފައިވާ ކަމަށް އީސީން ބުނެއެވެ.ރައްޔިތުންގެ މަޖިލީހުގެ އިންތިޚާބު އަންނަ މަހުގެ 6 ވަނަ ދުވަހު ބާއްވާއިރު 87 ދާއިރާއަކަށް މެމްބަރުން ހޮވާނެއެވެ.