ހދ.ކުމުންދޫގެ ވަލުތެރޭގެ ބޮޑު ސަރަހައްދެއްގައި އަލިފާން ރޯވެ އަދައިފިއެވެ.

އެމްއެންޑީއެފުން ބުނީ މި ހާދިސާގެ މައުލޫމާތު އެމްއެންޑީއެފް ނޮދަން އޭރިއާ، ހދ.ކުޅުދުއްފުށީ ފަޔަރ ސްޓޭޝަނަށް ލިބިފައިވަނީ ބުރާސްފަތި ދުވަހުގެ 15:32 ހާއިރު ކަމަށެވެ. އަދި ފަޔަރ ސްޓޭޝަންގެ ސިފައިން ކުޅުދުއްފުށިން ކުމުންދޫއަށް ގޮސް އަލިފާން ނިންވުމުގެ މަސައްކަތް ފެށުނީ 16:03 ހާއިރު ކަމަށެވެ.

އެމްއެންޑީއެފުން ބުނީ ކުމުންދޫގެ ވަލުތެރޭގެ 700 ފޫޓްއަށްވުރެ ބޮޑު ސަރަޙައްދެއްގެ އެކި ހިސާބުތަކުގައި ރޯވެފައިއޮތް އަލިފާންގަނޑު ނިއްވާލުމަށް ކުރި މަސައްކަތުން، އަލިފާން އެއްކޮށް ނިއްވާލެވިފައިވަނީ މިރޭ 20:41 ހާއިރު ކަމަށެވެ.

މީގެ އިތުރުން އެމްއެންޑީއެފުން ބުނީ ވަލުތެރޭގެ ބޮޑު ބައެއް ވަނީ އަނދައިގެން ގޮސްފައި ކަމަށެވެ.

ނަމަވެސް، ހާދިސާއާ ގުޅިގެން އެއްވެސް މީހަކަށް ގެއްލުމެއް ލިބުނުކަމުގެ މައުލޫމާތު ލިބިފައި ނުވާ ކަމަށް އެމްއެންޑީއެފުން ބުންޏެވެ.