ކުނި ރަނގަޅު ގޮތުގައި ނައްތާނުލެވޭ ނަމަ، ޓުއަރިޒަމްގެ ވިޔަފާރި ކުރިއަކަށް ނުގެންދެވޭނެ ކަމަށާއި، އެކަމުގެ ސީދާ ގެއްލުން ވާނީ ރައްޔިތުންނަށް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މާފުއްޓަށް ބިއްލޫރި ފުޅި ތައާރަފްކުރަން ހޭންޑީ ވޯޓަރގެ ފަރާތުން މާފުށީގައި ބޭއްވި ހަފުލާއެއްގައި ވާކަކަފުޅުދައްކަވަމުން ރައީސް ނަޝީދު ވިދާޅުވީ، ކުނި ނައްތާނުލެވެމުން އޭގެ ނޭދެވޭ އަސަރު ކުރާނީ އެންމެ ބޮޑަށް ފަތުރުވެރިކަމުގެ ދާއިރާއަށް ކަމަށެވެ.
"ތަރައްގީ ވަމުން ދާ އިރުގައި، އެ ތަރައްގީއަކީ ފިތުރަތުގެ އުސޫލުގައި، ގުދުރަތާއި އެއްގޮތަށް ހިންގޭ ތަރައްގީއަކަށް ނުވެއްޖެނަމަ، އަޅުގަނޑުމެންނަށް އެބެ އިނގޭ އެއްމެ ފަހުން އައިސް ސިދާ ގެއްލުން ވަނީ ތިމަންނާއަށްކަން. ތިމަންނާގެ އާމްދަނީއަށްކަން. ތިމަންނާގެ އާއިލާއަށްކަން. ތިމަންނާ އަދާކުރާ ވަޒީފާ ގެއްލި ދަނީކަން" ނަޝީދު ވިދާޅުވިއެވެ.
ނަޝީދު ވިދާޅުވީ ކުނީގެ ތެރެއިން ވެސް އެއްމެ ނުރައްކާތެރި ބާވަތަކީ ޕްލާސްޓިކް ކަމަށާއި، ހާއްސަކޮށް އެއް ފަހަރު ބޭނުންކޮށްފައި އުކާލަންޖެހޭ ޕްލާސްޓިކުގެ ބާވަތްތައް ކަމަށެވެ. އަދި މި ބާވަތްތަކުގެ ކުނި ނައްތާލަން އުނދަގޫ ކަމަށާއި، އެ ތަކެތި ނައްތާލިޔަސް އޭގަ ސަބަބުން ގޮނޑުދޮށާއި ވަށައިގެންވާ މާހައުލަށް ގެއްލުން ލިބޭ ކަމަށް ވެސް އެ މަނިކުފާނު ވިދާޅުވިއެވެ.
މީގެ އިތުރުން ނަޝީދު ވިދާޅުވީ ތަރައްގީ ގެންނަން ޖެހޭނީ ފިތުރަތުގެ އުސޫލުތަކާ ގުދުރަތީ ހަމަތަކުގެ މަތިން ކަމަށެވެ. އަދި މިހެން ކަންނުކުރެވިއްޖެ ހާލަތެއްގައި އޭގެ ސީދާ ގެއްލުން ކުރާނީ ރައްޔިތުންނަށާއި ރައްޔިތުންގެ ޖީބަށް ވަންނަ އާމްދަނީއަށް ކަމަށް ވެސް އެ މަނިކުފާނު ވިދާޅުވިއެވެ.
ރައީސް ނަޝީދު ވަނީ މާފުށީ ކައުންސިލާއި ހޭންޑީ ވޯޓަރ ގުޅިގެން ފެށި މަޝްރޫއަށް ވަރަށް ބޮޑަށް ތައުރީފްކުރައްވާފައެވެ. އަދި ރަށުގެ މައްސަލަތަކަށް ހައްލު ހޯދަން ކައުންސިލާއި ރައްޔިތުން ގުޅިގެން ކުރައްވާ މަސައްކަތްތަކަށް ވެސް އެ މަނިކުފާނު ތައުރީފްކުރެއްވިއެވެ.
300 އެއްހާ ގެދޮރާއި 750 ވަރަކަށް ގެސްޓުހައުސް ކޮޓަރި ހިމެނޭ މާފުށީގައި ދުވާލެއްގެ މައްޗަށް ގާތްގަނޑަކަށް 2500 ޕްލާސްޓިކު ފުޅި އުކާލަންޖެހެއެވެ. މާފުށީގައި ހޭންޑީ ވޯޓަރއިން ފެށި މަޝްރޫއުގެ ދަށުން އެރަށުގެ ކޮންމެ ގެއަކަށް 3 ބިއްލޫރި ފުޅިއާއި ޕަމްޕަކާއި އަދި ބޮޑު ފުޅިއެއް ވަނީ ހަދިޔާކޮށްފަ އެވެ. އަދި ކޮންމެ ގެސްޓް ހައުސް ކޮޓަރިއަކަށް ދޭން ނިންމާފައި ވަނީ 2 ބިއްލޫރި ފުޅިއެވެ.
