މި މަހުގެ 17 ވަނަ ދުވަހު ގއ. ވިލިނގިލީގައި މަރުވެފައި އޮއްވާ ފެނުނު އައްޑޫ ސިޓީ، ހިތަދޫ، ހުސައިން ސިމާދު މަރުވެފައި ވަނީ ކަރަންޓުގައި ޖެހިގެން ކަމަށް ލަފާކުރެވޭ ކަމަށް އެކްޓިން ކޮމިޝަނަރ އޮފް ޕޮލިސް މުހައްމަދު ހަމީދު (އެމްސީ ހަމީދު) ވިދާޅުވެއްޖެއެވެ.
ސިމާދުގެ ހަށިގަނޑު ފެނިފައި ވަނީ ވިލިނގިލީ އުތުރު ފަރާތު ހަރުގެއިންނެވެ.
އެ މައްސަލައިގެ ތަހްގީގާ ބެހޭ ގޮތުން ހޯމަ ދުވަހު ކުރެއްވި ޓްވީޓެއްގައި ހަމީދު ވިދާޅުވީ، ސިމާދުގެ މަރުގެ މައްސަލާގައި ފުލުހުން ކުރި ތަހްގީގުން ހާމަވެފައިވާ ގޮތުން ސިމާދު މަރުވެފައި ވަނީ ކަރަންޓުގައި ޖެހިގެން ކަމަށެވެ. އަދި އެއްވެސް ރައްޔިތެއްގެ ފުރާނައަށް ނުރައްކާވާ ގޮތަށް ކަންތައް ނުކުރުމަށް ހަމީދު ވަނީ އިލްތިމާސްކުރައްވާފައެވެ. ހާއްސަކޮށް އެންގުމެއް ނެތި ރައްޔިތަކަށް އަނިޔާވާ ފަދަ ކަމެއް ނުކުރުމަށް ވެސް ހަމީދު ވަނީ ގޮވާލައްވާފައެވެ.
Investigative findings in the case of Hussain Simad of GA Vilingili, Dhethandimaage, suggest the cause of death to be electrocution. We urge the public to not take measures in property protection, that are likely to put one’s life in danger, especially without due notice.
— Mohamed Hameed (@M_Hameedh) February 25, 2019
ސިމާދުގެ މަރާ ގުޅިގެން ގއ. ވިލިގިލީގައި ވެސް ވާހަކަ ދެކެވެމުން ދަނީ އޭނާ މަރުވީ ކަރަންޓް ޖެހިގެން ކަމަށެވެ. ވައްކަން ކުރަން ވަދެ އުޅެނިކޮށް ކަރަންޓް ޖެހުނީ ކަމަށް އަޑު އެތުރިފައިވެއެވެ. އަދި އެއީ އެތަނުގައި ޖަހާފައިވާ ކަރަންޓް ދަންތުރައެއް ކަމަށް ވެސް އަޑު ފެތުރިފައި ވެއެވެ.
ސިމާދުގެ މަރުގެ މައްސަލާގައި މިހާތަނަށް އެއްވެސް މީހަކު ހައްޔަރުކޮށްފައެއް ނުވެއެވެ.
