އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ދެއްކެވި ވާހަކަތަކާއި ގުޅިގެން، އެ ގައުމުގައި ބާއްވަން އޮތް އިރުމަތީ އަދި މެދުތެރޭ ޔޫރަޕުގެ ގައުމުތަކުގެ ބައްދަލުވުމަށް ވަޑައިނުގަންނަވާނެ ކަމަށް ޕޮލެންޑްގެ ބޮޑު ވަޒީރު މަތެއުޒް މޮރަވީކީ ވިދާޅުވެއްޖެއެވެ.
މޮރަވީކީ އިޒްރޭލަށް ނުދާން ނިންމީ، ނަތަންޔާހޫ މި ފަހުން ޕޮލެންޑަށް ކުރި ޒިޔާރަތެއްގައި ދެވަނަ ބޮޑު ހަނގުރާމައިގެ ދުވަސްވަރު ގިނަ އަދަދެއްގެ ޔަހޫދީން މަރާލި މައްސަލައިގައި ޕޮލެންޑުން ވެސް ބައިވެރިވެފައިވާ ކަމަށް ވިދާޅުވުމުންނެވެ. މޮރަވީކީގެ ބަދަލުގައި އެ ބައްދަލުވުމަށް ވަޑައިގަންނަވަން ހަމަޖެހިފައިވަނީ ޕޮލެންޑުގެ ފޮރިން މިނިސްޓަރު ޖަސެކް ކަޕުޓޮވިޗްއެވެ.
މި މައްސަލައާއި ގުޅިގެން އިޒްރޭލުން ޕޮލެންޑަށް ކަނޑައަޅާފައި ހުންނަ ސަފީރު އަނާ އަޒާރީ ވަނީ ހާޒިރު ކޮށްފައެވެ. އަޒާރީ މައުލޫމާތު ދީފައިވާ ގޮތުގައި ނަތަންޔާހޫގެ ވާހަކަތަކުގައި ނިސްބަތްކޮށްފައި ވަނީ ޖަރުމަނުގެ ނާޒީންނަށް އެހީތެރިވެދިން ވަކި ވަކި ޕޮލެންޑުގެ ފަރުދުންނަށް ކަމަށެވެ. އިޒްރޭލުގެ ބޮޑުވަޒީރުގެ އޮފީހުން ވެސް ބުނެފައިވަނީ ނަތަންޔާހޫ އެހެން ނުބުނާ ކަމަށާއި، އެއީ މީޑިއާއިން އޮޅުވާލައިގެން ދައްކާ ވާހަކަތަކެއް ކަމަށެވެ.
ދެވަނަ ބޮޑު ހަނގުރާމައިގެ ދުވަސްވަރު ޖަރުމަނުގެ ސިފައިން ޕޮލެންޑުގައި ހިންގި "ޑެތް ކޭމްޕް" ތަކުގައި 3 މިލިއަނާއި ގާތްކުރާ އަދަދަކަށް ވަނީ މީހުން މަރާލާފައެވެ. މީގެ ތެރޭގައި ޔަހޫދީންނާއި ޕޮލެންޑުގެ ނަސާރާ ދީންގެ މީހުން ވެސް ހިމެނެއެވެ.
