ޕީޕީއެމް ހިންގަމުން ދަނީ އެޕާޓީގެ ޤަވާއިދާ ޚިލާފަށް ކަމަށް ތުހުމަތު ކުރައްވައި އެޕާޓީން ވަކިވެވަޑައިގަތުމަށް ހެރިޓޭޖް މިނިސްޓަރ ޔުމްނާ މައުމޫނާއި ފިޝަރީޒް މެރިން ރިސޯސް އެންޑް އެގްރިކަލްޗަރ މިނިސްޓަރު ޒަހާ ވަހީދުގެ އިތުރުން ހައުސިން މިނިސްޓަރު އާމިނަތު އާތިފާ ޝަކޫރު ސިޓީ ހުށައަޅުއްވައިފިއެވެ.
އަންގާރަ ދުވަހު ޔުމްނާ ކުރެއްވި ޓްވީޓެއްގައި ވިދާޅުވީ، ގޮންޖެހުންތަކާ އެކުގައި ވެސް އިސްލާހީ މަސައްކަތުގައި ކުރިއަށް ވަޑައިގަންނަވާނެ ކަމަށެވެ. މި ސަރުކާރުގެ ވަޒީރެއްގެ ގޮތުގައި އެ ތިން ބޭފުޅުން އައްޔަންކުރެއްވި އިރު ވެސް ތިއްބެވީ ޕީޕީއެމްގެ މެންބަރުންގެ ގޮތުގައެވެ.
ޕީ.ޕީ.އެމް އިިން ވަކިވާން އަޅުގަނޑު ސިޓީ ލައިިފިން. ގޮންޖެހުން ތަކާ އެކު ވެސް އިސްލާޙީ މަސައްކަތުގައި އިރާދަ ކުރެއްވިއްޔާ އަޅުގަނޑުމެން ދާނީ ކުރިއަށް. #MRMkerigenkuriyah #Majlis2019 pic.twitter.com/u3LmUdc6XQ
— Yumna Maumoon (@yumna_maumoon) February 5, 2019
ޕީޕީއެމް އިން ވަކިވެވަޑައިގަތުމަށް އެދި އެ ޕާޓީއަށް ހުށައެޅުއްވި ސިޓީގައި ޔުމްނާ ވިދާޅުވެފައި ވަނީ ޕީޕީއެމް މިހާރު ހިންގަމުންދަނީ އެޕާޓީގެ އަސާސީ ޤަވާއިދާއި ހިންގާ ޤަވާއިދާ ޚިލާފަށް ކަމަށް ޤަބޫލުކުރެެއްވޭތީ ޕާޓީގައި އިތުރަށް ހުންނަވަން ބޭނުންފުޅު ނުވާ ކަމަށާއި، އެޕާޓީގެ ދަފްތަރުން ނަން އުނިކޮށްދެއްވުމަށް އެދިވަޑައިގަންނަވާ ކަމަށެވެ.
ޕީޕީއެމްއިން ޔުމްނާ ވަކިވެވަޑައިގެންނެވި އިރު އެކަމަނާގެ ބައްޕާފުޅު ކުރީގެ ރައީސް މައުމޫނާ ޕީޕީއެމް ހަވާލުކޮށްދިނުމަށް އެދި އަމިއްލަ ފަރާތަކުން ސިވިލް ކޯޓަށް ހުށަހަޅާފައިވާ މައްސަލަ ނުބެލޭނެ ކަމަށް ސުޕްރީމް ކޯޓުން އަންގާރަ ދުވަހު ވަނީ ހުކުމް ކޮށްފައެވެ. އަދި ރައީސް މައުމޫން އިސްވެ ހުންނަވައިގެން އިތުރު ސިޔާސީ ޕާޓީއެއް އުފެއްދެވުމުގެ މަސައްކަތް ވަނީ ފައްޓަވާފައެވެ.
