ތަފާތުކުރުމެއް ނެތި ހަމަހަމަ ކަމާ އެކު ބޯހިޔާވެހިކަން ކަށަވަރުކޮށްދިނުމަށް "ބޯހިޔާވަހިކަމުގެ" ބިލެއް ރައްޔިތުންގެ މަޖިލީހަށް ހުށަހެޅުމަށް އެމްޑީޕީން ކަރުދާހެއް އެކުލަވާލައިފިއެވެ.
އެމްޑީޕީން އެ ކަރުދާސް ބިލެއްގެ ގޮތުގައި ހުށަހެޅުމަށް ނިންމާފައި ވަނީ އަލަށް އިންތިހާބު ކުރާ 19 ވަނަ ރައްޔިތުންގެ މަޖިލީހަށެވެ. ހޮނިހިރު ދުވަހު ހުޅުމާލެ ބްރައިޓް ވޭ އިންޓަނޭޝަނަލް ސްކޫލްގައި އެމްޑީޕީން ބޭއްވި ވޯކްޝޮޕްގައި އެ ބިލްގެ ޑްރާފްޓެއް ވަނީ ހުށައަޅާފައެވެ.
އެ ބިލު ހަދަންޖެހޭ ސަބަބަކީ 40،000 މީހުން ބޯހިޔާވަހިކަން ބޭނުންވާތީ ކަމަށާއި ބޯހިޔާވަހިކަން ބޭނުންވާ ފަރާތްތައް އިތުރަށް ދެނެގަތުމަށް ދިރާސާތައް ހަދަންޖެހޭ ކަމަށް އެ ކަރުދާހުގައިވެއެވެ. މީގެ އިތުރުން ބޯހިޔާވެހިކަން ފޯރުކޮށްދިނުމަށް ސަރުކާރުތަކުން ގެންގުޅެފައިވާ ނުރަނގަޅު ކަންކަން ރަނގަޅުކޮށް، އެކަން ތަކުރާރު ނުވާނެ ގޮތަށް ގާނޫނު ބައްޓަން ކުރަން އެމްޑީޕީން ހުށަހެޅި ކަރުދާހުގައި ވަނީ ލާޒިމުކޮށްފައެވެ.
މާލޭ ސަރަހައްދުގައި ބޯހިޔާވަހިކަން ފޯރުކޮށްދޭނެ ގޮތް އެ ކަރުދާހުގައި ވަނީ ހިމަނާފައެވެ. އެގޮތުން މާލެ އާއި ވިލިގިއްޔާއި ގުޅީފަޅާއި ތިލަފުށި ގުޅުވާލާ އެ ކަރުދާހުގައި ވަނީ ހުށަހަޅާފައެވެ. އަދި ގުޅީފަޅާއި ތިލަފުށީ ފަޅުން ނުހިއްކިވާ ސަރަޙައްދު ހިއްކުމުގެ މަސައްކަތުގެ ދިރާސާތައް ސަރުކާރުން ހަދަންޖެހޭނެ ކަމަށް ވަނީ އެ ކަރުދާހުގައި ވަނީ ބަޔާންކޮށްފައެވެ.
ބޯހިޔާވަހަކާ ގުޅޭ ގޮތުން އެމްޑީޕީ ހުށަހެޅި ކަރުދާހުގައިވާ ގޮތުން، އެއްފަސްކުރުމަށް ހިޖުރަކުރުން މަޖުބޫރު ކުރާ ހުއްޓާލުމަށާއި ބިން ހިއްކާނެ ގޮތުގެ އުސޫލު ގާނޫނުގައި އެކުލަވާލުން ހިމެނެއެވެ. އަދި ހިއްކެން ނެތް ރަށްތައް އެހެން ރަށްތަކާ ގުޅުވާލުމާއި ހުޅުމާލޭގައި ހިއްކި ބިން މާލޭގައި ދިރިއުޅޭ މީހުންނަށް ހާއްސަ ކުރަން ވެސް އެމްޑީޕީން ހުށަހެޅި ބޯހިޔާވަހިކަމާ ގުޅޭ ކަރުދާހުގައިވެއެވެ.
އެމްޑީޕީން ހުށަހަޅާ ބޯހިޔާވަހިކަމުގެ ބިލުގައި ހިމެނޭ ކަންކަން
- ބޯހިޔާވަހިކަން ބޭނުންވާ ފަރާތްތަކުގެ ޝަރުތު ކަނޑައެޅުން
- ބޯހިޔާވަހިކަން ދޭނެ ގޮތުގެ ޕްރޮސެސް ޤާނޫނުގައި ލިޔުން
- ނުކުޅެދުންތެރިކަން ހުންނަ މީހުންނަށް، ފްލެޓް ދިނުން އިސްކަން ދިނުން
- ތަނަވަސްކަން ނެތް މީހުންނަށް ކުޑަ އިންޓްރެސްޓެއްގައި ލޯނު ދިނުން
- މާލޭ ބިންކޮޅެއް ދޫކޮށްލުމުން، ގޯތި/ފްލެޓް ދޭނެ ގޮތް ކަނޑައެޅުން
އަލަށް އިންތިހާބު ކުރާ މަޖިލީހަށް މި ބިލު ހުށަހެޅޭނީ މި ބިލަށް ރައްޔިތުންގެ ޚިޔާލު ހޯދުމުގެ ފުރުސަތު ދިނުމަށްފަހު އެ ޚިޔާލުތަކަށް ރިޔާއަތްކުރުމަށްފަހުގައި ކަމަށް އެމްޑީޕީން ބުނެއެވެ. އެމްޑީޕީން ބުނީ މި ގާނޫނަކީ ތަސްދީގުކުރެވޭ ދުވަހުން ފެށިގެން ޢަމަލުކުރުން ލާޒިމުވާ ގޮތަށް ހެދޭނޭ ޤާނޫނެއް ކަމަށެވެ.
