ރ. މާކުރަތު ކައުންސިލް އިދާރާއާއި ރަށު ކޯޓުގެ އިތުރުން އެރަށު ހެލްތް ސެންޓަރު ފަޅާލައި ގިނަ އަދަދެއްގެ ފައިސާ ވަގަށް ނަގައިފި އެވެ. 

ރ. މާކުރަތު ކައުންސިލްގެ ރައީސް ހަސަން އަލީ ވިދާޅުވި ގޮތުގައި އެ ރަށުގައި ހުރި ސަރުކާރުގެ ހުރިހާ މުއައްސަސާތަކެއް ފަޅާލަފައި ވަނީ ބުރާސްފަތި ދުވަހުގެ ރޭ ދަންވަރުގެ ވަގުތެއްގަ އެވެ.

ހަސަން އަލީ ވިދާޅުވި ގޮތުގައި ކައުންސިލް އިދާރާގެ ތިޖޫރި ހަލާކުކޮށްލައި، 40،000 ރުފިޔާ ވަގަށް ނަގާފައިވާ ކަމަށެވެ. އަދި ހެލްތު ސެންޓަރުގެ ތިޖޫރި ވަގަށް ގެންގޮސްފައިވާ ކަމަށާއި އެ އިދާރާގައި ހުރި 15،000 ރުފިޔާ ވެސް ވަގަށް ނަގާފައިވާ ކަމަށެވެ. 

ހެލްތު ސެންޓަރުގެ ތިޖޫރީގައި ހުރީ ކިހާ އަދަދެއްގެ ފައިސާއެއް ކަމެއް އަދި ނޭނގެ އެވެ. އަދި ކޯޓުން ވަގަށް ނަގާފައިވާ ތަކެތީގެ މައުލޫމާތެއް ވެސް ނޭނގެ އެވެ. 

މާކުރަތުގައި ހުރި ސަރުކާރުގެ ހުރިހާ އޮފީހެއް ފަޅާލި މައްސަލައިގެ ތަހްގީގަށް ފުލުހުން ދަނީ އެ ރަށުގައި ހަރަކާތްތެރި ވަމުންނެވެ. 

މާކުރަތު ކައުންސިލުން ބުނެފައި ވަނީ މިހާތަނަށް ފުލުހުން ބަލާފައިވަނީ ހެލްތް ސެންޓަރު އެކަނި ކަމަށާއި ހުކުރަށް ފަހު ކައުންސިލްގެ އިތުރުން ރަށު ކޯޓް ބެލުމުގެ މަސަތްކަތް ފައްޓާނެ ކަމަށެވެ. މިހާތަނަށް އަދި މި މައްސަލައިގައި މީހަކު ހައްޔަރުކޮށްފައެއް ނުވެއެވެ.

މިކަމާއި ގުޅިގެން ފުލުހުންގެ ބަހެއް އަދި ލިބޭ ގޮތެއް ވަނީ ނުވެފައެވެ.