ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހުގެ ސަރުކާރު ދެމެހެއްޓުމަށް ވަރުބަލިކަމެއްނެތި މައުމޫން ރިފޯމް މޫވްމަންޓް (އެމްއާރްއެމް) މަސައްކަތް ކުރާނެ ކަމަށް ކުރީގެ ރައީސް މައުމޫން ޢަބްދުލްޤައްޔޫމް ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރެއްވި ޓްވީޓެއްގައި ރައީސް މައުމޫން ވިދާޅުވީ، ކޯލިޝަން ޕާޓްނަރެއްގެ ހައިސިއްޔަތުން ހަތަރު ޕާޓީގެ ކޯލިޝަން ދަމަހައްޓައި ވަރުގަދަ ކުރުމަށް އެމްއާރްއެމްއިން ވަރުބަލި ކަމެއް ނެތި މަސައްކަތް ކުރާނެ ކަމަށެވެ. އަދި ހެޔޮ ވެރިކަމާއި ޤާނޫނުގެ ހުކޫމަތު ރައްކާތެރި ކުރުމުގައި ރައީސް ސޯލިހަށް އެމްއާރްއެމްގެ ފުރިހަމަ އެއްބާރުލުން ލިބޭނެ ކަމަށްވެސް ރައީސް މައުމޫން ވަނީ ވިދާޅުވެފައެވެ.
As one of the coalition partners, MRM will work tirelessly towards strengthening the 4-party coalition and continue to fully support President @ibusolih in safeguarding the rule of law and good governance in Maldives.
— Maumoon Abdul Gayoom (@maumoonagayoom) January 24, 2019
ބުރާސްފަތި ދުވަހު މީޑިއާ އާއި ބައްދަލުކުރައްވައި ރައީސް ސޯލިހު ދެއްކެވި ވާހަކަފުޅުތަކާއި ގުޅޭގޮތުން ކުރެއްވި އިތުރު ޓްވީޓެއްގައި ރައީސް މައުމޫން ވިދާޅުވީ، ވަރަށް ސާފުކޮށް، އަދި ވަރަށް ސާބިތުކަމާއިއެކު ރައީސް ސޯލިހު އެމަނިކުފާނުގެ ސިޔާސަތުތަކާއި އިސްކަން ދެއްވާ ކަންކަން ރައްޔިތުންނަށް ހާމަކޮށްދެއްވާފައިވާ ކަމަށެވެ.
President Ibrahim Mohamed Solih @ibusolih defined his policies and priorities clearly and firmly in his press briefing today. Very impressive!
— Maumoon Abdul Gayoom (@maumoonagayoom) January 24, 2019
ރައީސް މައުމޫން މިފަދައިން ޓްވީޓް ކުރެއްވިއިރު، ރައްޔިތުންގެ މަޖިލީހުގެ އިންތިހާބާއި ގުޅިގެން ކޯލިޝަންގެ ތެރޭގައި އުފެދިފައިވާ ނުތަނަވަސްކަމުގެ އަސަރެއް ކޯލިޝަނަށް ނުކުރާނެކަމުގެ ޔަޤީންކަން ކޯލިޝަންގައި ހިމެނޭ ޕާޓީތަކުން ދަނީ ރައްޔިތުންނަށް ދެމުންނެވެ.
