އެމްއެމްޕީއާރްސީ މެދުވެރިކޮށް ދައުލަތަށް ވަންނަންޖެހޭ އެތައް ބިލިއަން ރުފިޔާ އަކަށް ޚިޔާނާތްތެރިވި މައްސަލައިގެ ތަހުގީގު ރިޔާސީ ކޮމިޝަނުން ފަށައިފި އެވެ.
ކޮރަޕްޝަނުގެ މައްސަލަތައް ބަލާ ތަހްގީގުކުރުމަށް ރައީސް އިބްރާހިމް މުހައްމަދު ސޯލިހް އެކުލަވާލެއްވި ކޮމިޝަނުން އެމްއެމްޕީއާރުސީގެ މައްސަލަ ބަލަމުންދާ ކަން ހާމަކޮށްފައިވަނީ ބުރާސްފަތި ދުވަހު އެކޮމިޝަނުން ކުރި ޓުވީޓެއްގަ އެވެ.
ރައީސް ސޯލިހް އުފެއްދެވި ރިޔާސީ ކޮމިޝަނަކީ ދައުލަތުގެ ތެރޭގައި ހިންގި ޚިޔާނާތާއި މަނީ ލޯންޑަކުރުމުގެ މައްސަލަތައް ބަލައި ގެއްލުނު ފައިސާ އަނބުރާ ހޯދަން އުފެއްދި ކޮމިޝަނެވެ. އެހެން ކަމުން އެ ކޮމިޝަނުން ބަލަން ފެށި އެންމެ ބޮޑު މައްސަލައަކަށް ވެފައި މި ވަނީ އެމްއެމްޕީއާރުސީގެ ހިޔާނާތުގެ މައްސަލަ އެވެ.
އެ ކޮމިޝަނުން ވަނީ އެމްއެމްޕީއާރުސީގެ ހިޔާނާތާ ގުޅޭ އެއްވެސް ލިޔެކިޔުމެއް އަދި މައުލޫމާތެއް ހުރި ނަމަ އެ ކޮމިޝަނާ ހިއްސާ ކުރެއްވުމަށް އެދިފައި އެވެ.
އެމްއެމްޕީއާރްސީ މެދުވެރިވެގެން ހިންގިކަމަށް ތުހުމަތު ކުރެވޭ ޚިޔާނާތުގެ މައްސަލަ މި ގެންދަނީ ތަޙުޤީޤު ކުރަމުން. މި މައްސަލައިގެ ތަޙުޤީޤަށް ބޭނުން ހިފޭނޭ ލިޔެކިއުމާއި މައުލޫމާތު ހުރި ނަމަ، ޙިއްޞާކޮށްދެއްވުން އެދެން. އީމެއިލް: [email protected]
— Presidential Comm on Corruption & Asset Recovery (@PComCAR) January 10, 2019
އެމްއެމްޕީއާރްސީ މެދުވެރިކޮށް ހިންގި ހިޔާނާތުގެ ފައިސާގެ އަދަދު 1.4 ބިލިއަނަށް އަރަ އެވެ. ފަޅުތަކާއި ފަޅުރަށްތައް ކުއްޔަށް ދޫކޮށްގެން ދައުލަތަށް ލިބެންޖެހޭ އެތައް ބިލިއަން ރުފިޔާއަކަށް ޚިޔާނާތްތެރިވެފައިވާއިރު،އަމިއްލަ އެކައުންޓްތަކަކަށް އެއް ބިލިއަން ރުފިޔާ ޖަމާކޮށްފައި ވެއެވެ.
