"ނެޝަނަލް ރީފޯމް ޕާޓީ" ގެ ނަމުގައި ޕާޓީއެއް ހެދުމަށް އިލެކްޝަންސް ކޮމިޝަނުން ހުއްދަ ދީފިއެވެ.
އާދިއްތަ ދުވަހު އީސީން ކޮށްފައިވާ ޓްވީޓްގައި ވަނީ "ނެޝަނަލް ރީފޯމް ޕާޓީ" ގެ ނަމުގައި ޕާޓީއެއް އުފެއްދުމަށްޓަކައި ކުރަންޖެހޭ މަސައްކަތް ކުރުމުގެ ހުއްދަ އެ ކޮމިޝަނުން ދީފައިވާ ކަމަށެވެ.
ނެޝަނަލް ރިފޯމް ޕާޓީ އުފެއްދުމަށް އީސީން ހުއްދަ ދީފައިވާއިރު އެ ޕާޓީގެ ފަރާތުން ލިޔުމާ ހަވާލުވެވަޑައިގެންނެވީ ކުރީގެ ރައީސް އަބްދުﷲ ޔާމީންގެ ސަރުކާރުގައި އިސްލާމިކް މިނިސްޓްރީގެ ސްޓޭޓް މިނިސްޓަރަކަށް ހުންނެވި މުޙައްމަދު ދީދީއެވެ. ކުރިން އަދާލަތު ޕާޓީގައި ހުންނެވުމަށް ފަހު ފަހުން ޕީޕީއެމް އަށް ބަދަލުވެވަޑައިގެން ރައީސް ޔާމީންގެ ރިޔާސީ ކެމްޕެއިންގައި ވެސް ދީދީ އުޅުއްވިއެވެ.
"National Reform Party" namugai siyaasee party eh ufehdhumahtakai kuran jehey masakkaiy kurumuge huhdha Elections Commissionun dheefi pic.twitter.com/KyZDwG08oM
— Elections Commission (@ElectionsMv) January 6, 2019
މީގެ އިތުރުން އީސީން ކޮށްފައިވާ އެހެން ޓްވީޓެއްގައި ވަނީ "ކަރިޝްމާ ޕާޓީ މޯލްޑިވްސް" ގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދައަށް އެދި ހުށަހެޅި ހުށަހެޅުން އެ ފަރާތުން އަނބުރާ ގެންގޮސްފައިވާ ކަމަށެވެ.
“Karisma Party Maldives” ge namugai siyaasee party ufehdhumuge huhdha ah edhi hushahellhi hushahelhun efaraathun anburaa gendhavaifi
— Elections Commission (@ElectionsMv) January 6, 2019
މި ދުވަސްވަރު ގިނަ ޕާޓީތަކެއް އުފެއްދުމުގެ މަސައްކަތް ދަނީ ކުރަމުންނެވެ. އޭގެ ތެރޭގައި ކުރީގެ ރައީސް ޔާމީން އިސްކޮށް ހުންނަވައިގެން އުފައްދަވާ ޕީޕްލްސް ނޭޝަނަލް ކޮންގްރެސް (ޕީއެންސީ) ހިމެނެއެވެ. ރާއްޖޭގައި މިހާރު ވެސް ހަތް ޕާޓީއެއް އެބަ އޮތެވެ. އެއީ ޕީޕީއެމް އާއި އެމްޑީޕީ، ޖުމްހޫރީ ޕާޓީ، އެމްޑީއޭ، އަދާލަތު ޕާޓީ، ޑީއާރުޕީ އަދި ދާދި ފަހުން ރަޖިސްޓްރީކުރީ ކުރީގެ ނައިބު ރައީސް އަހްމަދު އަދީބުގެ އެމްޓީޑީ އެވެ.
