ރައީސް އިބުރާހިމް މުހައްމަދު ސާލިހު ރައީސް ކަމުގެ ހުވާ ކުރެއްވުމަށްފަހު ގައުމުން ބޭރަށް ކުރެއްވި ފުރަތަމަ ރަސްމީ ދަތުރުފުޅު މި މަހުގެ 16 އިން 18 ވަނަ ދުވަހަށް ވަނީ އިންޑިއާ ކުރައްވާފަވެ.

މި ދަތުރުފުޅު ވެގެން ގޮސްފައިވަނީ އެތަށް ގޮތަކުން މުހިއްމު އަދި ތާރީޚީ ދަތުރުފުޅަކަށެެވެ. އެގޮތުން ދެގައުމުގެ ވެރިންގެ މެދުގައި މުހިއްމު މަޝްވަރާތަކެއްކުރެވިގެން ދިޔަ އިރު، ރާއްޖޭގެ ކުރިމަގަށްޓަކައި މުހިއްމު އެއްބަސްވުންތަކެއްގައި ސޮއިކުރެވިގެން ދިޔައެވެ. އަދި ރާއްޖޭގައި ހުރި އިންވެސްޓްމެންޓް ފުރުސަތުތަކަށް ބޭރުގެ އިންވެސްޓަރުންނާއި އިންޑިއާގެ ވިޔަފާރިވެރިންނަށް ވެސް ދައުވަތު އެރުއްވިއެވެ.

ރައީސް ސާލިހަށް އިންޑިއާއިން ކީ މަރުހަބާއަކީ، ރާއްޖޭގެ ވެރިއަކު އިންޑިއާއަށް ވަޑައިގަތުމުން ފަހުގެ ތާރީޚެއްގައި ރައީސަކަށް ދެންނެވުނު އެންމެ ހޫނު އަދި ކުލަގަދަ ބަރުހަބާއެވެ. އެއާއެކު އެގައުމުގެ ރައީސް ދިރިއުޅުއްވާ ދިއްލީގައި ހުންނަ ރިޔާސީ ގަނޑުވަރު "ރާޝްރަޕަތީ ބަވަން" ގައި ހުންނެވުމުގެ ޝަރަފު ލިބިވަޑައިގެންވި ދުނިޔޭގެ މަދު ގައުމުތަކުގެ ލީޑަރުންގެ ތެރޭގައި ރައީސް ސާލިހު ހިމެނިވަޑައިގަތުމަކީވެސް ވަކިން ކުޑަ ޝަރަފެއް ނޫނެވެ.

މި ދަތުރުފުޅުގެ ކާމިޔާބި ތަކަށް ބަލާލާއިރު، ރާއްޖެއަށް 800 މިލިއަން ޑޮލަރުގެ އެހީއެއް ވަނީ ދީފައެވެ. އަދި އެއީ ރާއްޖޭގެ ދަރަނި އިތުރަށް ބޮޑު ނުވާނެގޮތެއްގެ މަތިނެވެ. އޭގެ ތެރޭގައި ބަޖެޓް ސަޕޯޓަށް 200 މިލިއަން ޑޮލަރާއި ސަރުކާރުން ބޭނުންވާ މަޝްރޫއުތަކަށް ދިން 800 މިލިއަން ޑޮލަރު އަދި ކަރެންސީ ސްވެޕްގެ ގޮތުގައި ހަމަޖައްސައިދިން 400 މިލިއަން ޑޮލަރު ވަނީ ހަމަޖައްސައިދީފައެވެ.

މީގެ އިތުރުން ރާއްޖެއާއި އިންޑިއާއާ ދެމެދު މުހިއްމު ހަތަރު އެއްބަސްވުމެއްގައި ސޮއިކުރެވުނެވެ. އެގޮތުން  ވިސާގެ ކަންކަން ލުއިފަސޭހަ ކުރުމުގެ އެއްބަސްވުމަކާއި، ސަގާފީ ގޮތުން ގުޅުން ބަދަހި ކުރުމުގެ އެއްބަސްވުމަކާއި، އެގްރި ވިޔަފާރި ކުރިއެރުވުމުގެ އެއްބަސްވުމަކާއި، ޓެކްނޮލޮޖީގެ ދާއިރާއިން ގުޅުން ބަދަހި ކުރުމުގެ އެއްބަސްވުމެއްގައި ވަނީ ސޮއިކޮށްފައެވެ. ވިސާގެ އެއްބަސް ވުމާއެކު އިންޑިއާއަށް ދަތުރުކުރާ ދިވެހިނަށް އެތަށް ލުޔެއް ލިބިގެންދާނެކަމީ ޝައްކެއް ވެސް އޮތްކަމެއް ނޫނެވެ.

އެއްބަސްވުން ތަކަށްފަހު ދެގައުމުގެ ވެރިން ދެއްވި ސްޓޭޓްމެންޓްގައި، ބޮޑުވަޒީރު މޯދީ ވިދާޅުވީ، އިންޑިއާގެ ކަނޑުގެ ސަލާމަތަށްޓަކައި ރާއްޖެ އާއި އިންޑިއާއާ ދެމެދު ގުޅުންތައް ބަދަހިކުރަންޖެހޭ ކަމަށާއި އެކަމުގައި އަމަލު ކުރާނީ ދެ ގައުމަށް ވެސް ފައިދާވާ ގޮތަށް ކަމަށެވެ.  ރައީސް ސޯލިހުގެ ކާމިޔާބީއަކީ އިންޑިއާއިން ވެސް އުފާކުރާ ކާމިޔާބީއެއް ކަމަށާއި، އެ ކާމިޔާބީ ރައީސް ސޯލިހަށް ހޯއްދެވުނީ އެމަނިކުފާނުގެ ހިކުމަތްތެރިކަމުގެ ސަބަބުން ކަމަށް މޯދީ ވިދާޅުވި އެވެ.

"އިންޑިއާއަށް ނޫނީ ރާއްޖެއަށް ގެއްލުންވާ ފަދަ ކަމެއްގައި ދެ ގައުމުން ކުރެ އެއް ގައުމެއްގެ ބޭނުން ވެސް އެހެން ބަޔަކަށް ކުރެވިގެން ނުވާނެ، މި ގުޅުމަކީ ދެ ގައުމުގެ ހަމަހަމަ އަދި ބާރާބަރަށް ހިއްސާވާ ގުޅުމެއް،" މޯދީ ވިދާޅުވި އެވެ.

އެއްބަސްވުންތަކަށްފަހު ރައީސް ސާލިހު ދެއްކެވި ވާހަކަފުޅުގައި ސަރަހައްދީ ރައްކާތެރިކަން ގާއިމުކުރުމުގެ މުހިންމު ކަމުގެ މައްޗަށް އަލިއަޅުއްވާލައްވައި އިންޑިއާ ކަނޑުގެ ސަރަހައްދުގައި ގުޅިގެން ކަނޑުގެ ރައްކާތެރިކަން ކަށަވަރުކުރުމުގެ ގޮތުން ބަލާ ފާސްކޮށް މައުލޫމާތު ބަދަލުކުރުމަށް ނިންމަވާފައިވާ ކަމަށް ވިދާޅުވި އެވެ. އަދި، ޓެރަރިޒަމް ނައްތާލުމަށް އެކުގައި މަސައްކަތް ކުރުމަށާއި، ހިއުމަން ޓްރެފިކިން ހުއްޓުވުމަށާއި، މަސްތުވާތަކެތި އެތެރެ ކުރުން ހުއްޓުވުމަށް އެކުގައި މަސައްކަތްކުރުމަށް ދެ ގައުމުން ނިންމަވާފައިވާ ކަމަށް ވިދާޅުވިއެވެ.

ރައީސް ސާލިހުގެ އެ ދަތުރުފުޅުގައި އިންޑިއާގެ ރައީސް ރާމްނާތު ކޮވިންދާއި ބޮޑުވަޒީރު މޯދީ ރާއްޖެވަޑައިގަތުމަށް އެރުވި ދައުވަތު އެ ދެބޭފުޅުން ގަބޫލުފުޅުކުރައްވާ އަންނަ އަހަރު ރާއްޖެ ވަޑައިގަންނަވާނެކަމުގެ ޔަގީންކަން ދެއްވާފައިވާ ކަމަށް ރައީސް ސާލިހު ވިދާޅުވިއެވެ.

ރައީސް ސާލިހުގެ މި ދަތުރުފުޅުގައި އިންޑިއާގެ އާގަރާގައި ހުންނަ މުޅި ދުނިޔެއަށް ރީތިކަމާއި ފުރިހަމަކަމަށް މަޝްހޫރު ތާޖްމަހަލް ބައްލަވާލެއްވުމަށް އަނބިކަނބަލުން ފަޒްނާ އަހުމަދާއިއެކު އަންގާރަދުވަހު އެތަނަށް ޒިޔާރަތްކުރެއްވިއެވެ.

އިންޑިއާއަށް ކުރެއްވި ކާމިޔާބު ތާރީޚީ ދަތުރުފުޅަށްފަހު ރައީސްގެ ދެކަނބަލުން މާލެވަޑައިގެންނެވީ އަންގާރަ ދުވަހުގެރެއެވެ.