"އަހަންނަކަށް ނޭވާއެއް ނުލެވޭ" މިއީ ޚާޝުގްޖީގެ އެންމެ ފަހުބަސް ކަމަށް އޭނާ މަރާލެވުނު ވަގުތުގެ އެންމެ ފަހުވަގުތުކޮޅުގެ އޯޑިއޯ ޓޭޕްގެ ޓްރާންސްކްރިޕްޓާ ހަވާލާދީ ސިީއެންއެންއިން ބުނެފިއެވެ.
ސީއެންއެންއަށް މައުލޫމާތުދިން ފަރާތުން ބުނެފައިވާ ގޮތުގައި އެ މަރަކީ ކުރިން ރޭވިގެން ހިންގާފައިވާ މަރެއްކަމަށް ޓްރާންސްކްރިޕްޓުން އެނގެއެވެ. އަދި މަރުހަލާތައް ކުރިޔަށް ދިޔަގޮތް ކިޔައިދިނުމަށް އެތައް ފޯން ކޯލްތަކެއް ކޮށްފައިވާކަން އޭގެން އަންގައިދެއެވެ.
ސީއެންއެންއިން ބުނެފައިވާ ގޮތުގައި ތުރުކީގެ އޮފިޝަލުން ގަބޫލު ކުރައްވާ ގޮތުގައި އެ ކޯލްތައްކޮށްފައި ވަނީ ރިޔާޛްގައި ތިއްބަވާ އިސް އޮފިޝަލުންނަށެވެ.
ޚާޝުގްޖީ މަރާލެވުނުއިރު އޭނާއަށް ވަމުންދާ ގޮތްތައް ބުނެދެމުންދިއަ އަޑުވެސް އޯޑިއޯގައިވެއެވެ. އަދި ހަށިގަނޑުގެ ކީހަކުން ކޮށާކަން އަންގައިދޭ އަޑުވެސްވެއެވެ.
ތުރުކީގެ އިސްތަންބޫލްގައި ހުންނަ ސައުދީ އަރަބިއްޔާގެ ކޮންސިއުލޭޓްގައި މަރާލި ނޫސްވެރިޔާ ޖަމާލް ޚާޝުގްޖީގެ އެންމެ ފަހު ބަހަކަށްވީ "އަހަރެން ނޭވާހާސްވަނީ... އަހަރެން ބޮލުން ތި ކޮތަޅު ނައްޓާ،" ކަމަށް ތުރުކީގެ ދުވަހު ނޫހެއްް ކަމަށްވާ ސަބާ ނޫހުގެ ހެޑް އޮފް އިންވެސްޓިގޭޝަން މިދިޔަ ހަފްތާފައި އަލްޖަޒީރާ ނޫހުގައި ބުނެފައިވެއެވެ.
ޚާޝުގްޖީ ދިރިހުއްޓައި އެންމެ ފަހުން ފެނިފައި ވަނީ ސައުދީ ކޮންސިއުލޭޓަށް ލިއުމެއް ބަލާ އޮކްޓޯބަރު މަހުގެ ދެ ވަނަ ދުވަހު ދަނިކޮށެވެ. އޭގެ ފަހުން އޭނާގެ ޚަބަރެއް ވެފައި ނުވާއިރު އޭނާ މަރާލާފައިވާ ކަމަށް ތުރުކީން ބުނަމުންދާތާ އެތައް ދުވަހެއްފަހުން ސައުދީ އިން އެކަމަށް އެއްބަސްވެފައި ވަނީ އޮކްޓޯބަރު މަހުގެ 20 ވަނަ ދުވަހުއެވެ.
