ދިރިއުޅުމުގެ އަގުތައް މައްޗަށްދާތީ ފްރާންސްގެ ވެރިރަށް ޕެރިހުގައި ހޮނިހިރު ދުވަހު މުޒާހަރާކުރަމުންދިޔަ ފަރާތްތަކާ ދެކޮޅަށް ކަރުނަ ގޭހާއި ޕެޕަރސްޕޭރޭ ބޭނުންކޮށް 200 އަށްވުރެގިނަ މީހުން ހައްޔަރުކޮށްފިއެވެ.

"ޔެލޯ ވެސްޓް" ގެ ނަން ދީފައިވާ މި މުޒާހަރާ ފެށިގެންދިޔައީ ޑީސަލްގެ އަގު ބޮޑުވެގެންނެވެ.

ޑީސަލުން ނަގާ ޓެކްސް ބޮޑުކުރުމަށް ސަރުކާރުން މަސައްކަތްކުރުމުން ފެށުނު މުޒާހަރާތައް މިހަފްތާ ބަންދުގައި ހޫނުވެދާނެ ކަމަށް ލަފާކޮށް، ޕެރިހުގައި ފަތުރުވެރިންގެ މަޤްބޫލުކަން ލިބިފައިވާ ބައެއް ތަންތަން ހޮނިހިރު ދުވަހު ވަނީ ބަންދުކޮށްފައެވެ.

ފުލުހުންގެ ތަރުޖަމާނު ރިޕޯޓަރުންނަށް ވިދާޅުވީ ޗެމްޕްސް އެލީސީ ސަރަހައްދުގައި 1500 އެއްހާ މީހުން މުޒާހަރާކޮށްފައި ވާއިރު 211 މީހުން ހައްޔަރު ކުރެވުނުކަމަށެވެ. އެމީހުން ހައްޔަރުކުރީ ހަތިޔާރުގެ ގޮތުގައި ބެލެވޭ، ބޭސް ބޯލް ބެޓާއި، ދަގަނޑު ބޯޅަ ގެންގުޅެފައިވާތީ ކަމަށް ފުލުހުން ބުނެއެވެ.

ފަރަންސޭސީ ބޮޑުވަޒީރު އެޑުއަރޑް ފިލިއްޕެ ވިދާޅުވީ ޕެރިހުގެ މަޝްހޫރު އެއިފިލް ޓަވަރާއި، ޕެރިހުގެ މައި މަގުތަކުގައި ހުޅުވާފައިވާ ކެފޭތަކުގެ އިތުރުން ބައެއް ދާރުލްއާސާރުތައް ވެސް ހޮނިހިރު ދުވަހު ބަންދު ވާނެކަމަށެވެ. އޭގެ ތެރޭގައި މަޝްހޫރު ލޫވް މިއުޒިއަމް ހިމެނެއެވެ. ހަފްތާ ބަންދުގައި ގިނަ ތަންތަން ބަންދުކުރުމަށް ނިންމީ، ހަމަ ނު ޖެހުންތަކުގައި ޕެރިހުގެ އާސާރީ އަދި ފަތުރުވެރިންގެ މަޤްބޫލުކަން ހޯދާފައިވާ އާކް ޑި ޓްރައޯމްފް ފަދަ ތަންތަނަށް މުޒާހަރާކުރާ ފަރާތްތަކުން ގެއްލުން ދިނުމާއި ގުޅިގެންނެވެ. 

ނިމިދިޔަ ހަފްތާ ބަންދުން ފެށިގެން ޕެރިހުގެ މަގުތަކުގައި ހަމަ ނު ޖެހުން ހިނގަމުންދާއިރު ފަރަންސޭސީވިލާތުގެ އެކި ސަރަހައްދުތަކުގައި ސަލާމަތީ ކަންކަން ބެލެހެއްޓުމަށް 89 ހާސް ފުލުހުން ނެރެފައިވާ ކަމަށް ބޮޑުވަޒީރު ވިދާޅުވިއެވެ. މިއީ ފަހުގެ ތާރީޚެއްގައި އެޤައުމުގައި ހިނގާ މިފަދަ ދާޚިލީ އެންމެ ބޮޑު ހަމަނުޖެހުމެވެ. 

މުޒާހަރާތައް ހޫނުވެ، ތެލުން ނަގަން އުޅުނު ޓެކްސް އަންނަ އަހަރުގެ ބަޖެޓްގައި ނުހިމެނުމަށް ފަރަންސޭސީވިލާތުގެ ސަރުކާރުން މިހާރު ވަނީ ނިންމާފައެވެ. އެހެންނަމަ ވެސް ތެލުން ނަގަން އުޅޭ ޓެކްސް އާއި ހެދި ފެށުނު މުޒާހަރާތައް، ސަރުކާރުގެ ގިނަ ސިޔާސަތުތަކާއި މެދު ހިތްހަމަ ނުޖެހޭ މީހުން ޝުޢޫރުފާޅުކުރާ މުޒާހަރާތަކަކަށް ބަދަލުވުމާއި އެކު މުޒާހަރާތަކަށް ހުއްޓުމެއް ނާދެއެވެ.