ވާވޭގެ ސީއެފްއޯ މެންގް ވަންޖޫ ހައްޔަރު ކުރުމުގައި ކެނެޑާ ސަރުކާރުގެ އެއްވެސް ބައިވެރިވުމެއް ނޯންނާނެ ކަމުގައި ކެނެޑާގެ ބޮޑު ވަޒީރު ޖަސްޓިން ޓްރޫޑޯ ވިދާޅުވެއްޖެއެވެ.
ނޫސްވެރިންނާއި ވާހަކަދައްކަވަމުން ޓްރޫޑޯ ވިދާޅުވެފައިވަނީ، އެ ގައުމުގެ ސަރުކާރަށް މެންގް ހައްޔަރު ކުރަން އުޅޭ ކަމަށް އަންގާފައިވާ ކަމަށެވެ. ހައްޔަރު ކޮށްފައިވަނީ ކޯޓުތަކުގެ އެދުމުގެ މަތިން ކަމަށާއި އެ ގައުމުގައި އޮންނަނީ މިނިވަން ޖުޑީޝަރީއެއް ކަމަށް ވެސް އެ ބޭފުޅާ ވިދާޅުވިއެވެ. ޓްރޫޑޯ ވަނީ މިހައްޔަރުގެ ފަހަތުގައި އެއްވެސް ސިޔާސީ މަގްސަދެއް ނޯންނާނެ ކަމުގެ ޔަގީންކަން ވެސް ހާޒިރުވެ ތިބި ނޫސްވެރިންނަށް ދެއްވާފައެވެ.
ކެނެޑާއިން މެންގް ހައްޔަރު ކޮށްފައިވަނީ ހޮނިހިރު ދުވަހު އެ ގައުމުގެ ވެންކޫވަރ އެއަރޕޯޓުގައި ފުރަން ގޮސް ހުއްޓާ، އޭނާ ހައްޔަރު ކޮށްގެން އެމެރިކާއަށް ގެންދަން އެމެރިކާއިން އެދިފައި އޮތުމުންނެވެ.
ޗައިނާގެ ސަރުކާރުން ވަނީ މެންގް ދޫކޮށްލަން ގޮވާލާ، އޭނާގެ ހައްޔަރަކީ އިންސާނި ހައްގުތަކާއި ޙިލާފް އަމަލެއްގެ ގޮތުގައި ސިފަކޮށްފައެވެ.
އެމެރިކާގެ ގައުމީ ސަލާމަތާބެހޭ އެޑްވައިޒަރު ޖޯން ބޯލްޓަން ވަނީ މި ހައްޔަރާ ބެހޭ އެއްވެސް މައުލޫމާތެއް ނޫސްވެރިންނާއި ހިއްސާކުރަން އިންކާރު ކޮށްފައެވެ. ނަމަވެސް އޭނާ ވަނީ ޗައިނާގެ ސަރުކާރުގެ ގުނަވަނެއްގެ ގޮތުގައި އެ ގައުމުގެ ކުންފުނިތަށް މަސައްކަތް ކުރަމުންދާ ކަމުގެ ނުތަނަވަސްކަން އެބެހުރި ކަމަށް ވިދާޅުވެފައެވެ.
މިހާތަނަށް އޮސްޓްރޭލިޔާ އާއި ނިއު ޒިލެންޑުން ވަނީ ވާވޭގެ އުފެއްދުންތައް ބޭނުންކުރުން ވަނީ މަނާކޮށްފައެވެ. މީގެ އިތުރުން ޖަޕާނުން ވެސް ވާވޭގެ އުފެއްދުންތައް ބޭނުންކުރުން މަނާކުރާނެ ކަމަށް ވަނީ ބެލެވިފައެވެ.
ވާވޭއިން ނެރުނު ބަޔާނެއްގައި ބުނެފައިވަނީ އެ ކުންފުނިން ގާނޫނާ ގަވައިދާ ޙިލާފު އެއްވެސް ކަމެއް ކޮށްފައި ނުވާނެ ކަމަށެވެ. އެ ގޮތުގެ މަތިން އެ ކުންފުނިން އަބަދުވެސް އަމަލުކޮށްފައި ވާނީ އެމެރިކާ، އީޔޫ އަދި އ.ދ.ގެ ދަތިކުރުމުގެ ފިޔަވަޅުތަކަށް ރިއާޔަތް ކުރުމަށް ފަހުގައި ކަމަށެވެ.
މި އަހަރު ވާވޭއިން ވަނީ ދުނިޔޭގެ ވާދަވެރި ސްމާޓް ފޯނު ބާޒާރުގައި އެޕަލް ފަހަތަށް ޖައްސާލުމަށްފަހު ދެވަނަ ނަގާފައެވެ. ނަމަވެސް ހުޅަނގުގެ ގައުމުތަކުގައި އެ ކުންފުނި ވިޔަފާރި ކުރުމަށް ތަފާތު އެކި ހުރަސްތައް ކުރިމަތި ކުރުވުމުގެ ސަބަބުން، އެކަމުގެ ނޭދެވޭ އަސަރު އެ ކުންފުނީގެ ވިޔަފާރިއަށް ކޮށްފާނެ ކަމުގެ ނޭދެވެ އަސަރު ވަނީ ކޮށްފައެވެ.
