ދައުވާއެއް ކުރުމަކާނުލައި މިހާރުވެސް 713 ދުވަސް ޖަލުގައި ހޭދަކޮށްފައިވާ އަލް ޖަޒީރާގެ ނޫސްވެރިޔާ މަހްމޫދު ހުސެެއިންގެ ބަންދުގެ މުއްދަތު އިތުރު 45 ދުވަހަށް އިތުުރުކޮށްފިއެވެ.

މި ނިންމުން ނިންމާފައިވަނީ ނޮވެމްބަރު މަހުގެ 19 ވަނަ ދުވަހު ބޭއްވި އަޑުއެހުމަށްފަހު ނަމަވެސް އޭނާގެ ވަކީލަށްވެސް މިކަން އެނގިފައިވަނީ އާދީއްތަ ދުވަހުއެވެ.

 ގަތަރުގައި މަސައްކަތްކުރަމުންދިއަ ނޫސްވެރިޔާގެ މައްޗަށް މިސްރުން ތުހުމަތުކޮށްފައިވަނީ ދޮގު ޚަބަރު ފެތުރުމާއި ދައުލަތުގެ މުއައްސަސާތަށް ބަދުނާމުކުރުމަށް ބޭރުގެ ޖަމާއަތްތަކުން ފައިސާ ހޯދަމުން ދިޔަ ކަމަށެވެ. ނަމަވެސް އަދިވެސް ރަސްމީކޮށް އޭނާގެ މައްޗަށް ދައުވާއެއް އުފުލާފައެއް ނުވެއެެވެ.

ހުސެއިން އަދި އަލް ޖަޒީރާއިން އެ ތުހުމަތުތަކަށް ކަނޑައެޅިގެން އިންކާރުކުރާއިރު ބައިނަލްއަޤްވާމީ މުޖުތަމައުގެ ފާޑުކިޔުން މިސްރަށްވަނީ އަމާޒުވެފައެވެ.

ހުސެންގެ ބަންދުގެ މައްސަލަގައި މިސްރުންވަނީ އެ ގައުމުގެ ޤާނޫނުލް އުގޫބާތާވެސް ޚިލާފުވެފައެވެ.

އެ ގަައުމުގެ ގާނޫނުލް އުގޫބާތު ބުނާގޮތުން ވަކި ފަރުދަކު ކުށެއްގެ ތުހުމަތުގައި ހައްޔަރުކޮށް ދައުވާ ކުރުމަކާނުލައި ބެހެއްޓޭނެ އެންމެ ދިގު މުއްދަތަކީ 620 ދުވަހެވެ.

އިދާރާތަކަށް އޮތް ގޮތަކީ އޭނާ ދޫކޮށްލުން ނުވަތަ އޭނާ ކޯޓަށް ހާޒިރުކުރުމެވެ.

ހުސެން ހައްޔަރުކޮށްފައިވަނީ 2016 ވަނަ އަހަރުގެ ޑިސެމްބަރު މަހުއެވެ. އޭނާ ހައްޔަރުކޮށްފައިވަނީ އާއިލާގާތަށް އަހަރީ ޗުއްޓީއަށް ގާހިރާއަށް ދިއުމާއެކު މިސްރުގެ އިދާރާތަކުންނެވެ.

އޭގެ ފަހުން އޭނާ އެކަހެރިކޮށް ބަންދުގައި ބަހަޓައި އަދި ގާނޫނީ ވަކީލެއްގެ އެހީތެރިކަން ލިބުމުގެ ހައްޤުންވެސް މަހުރޫމުކޮށްފައިވެއެވެ.