އެޑްވެންޗާޒް އޮފް މޯލްޑިވްސް މުބާރާތަށް ވީޑިއޯ ހުށަހެޅުމުގެ މުއްދަތު އެމްއެމްޕީއާރްސީން އިތުރުކޮށްފިއެވެ.

އެމްއެމްޕީއާރްސީން ބުނީ ވީޑިއޯ ހުށަހެޅުމުގެ މުއްދަތު ޑިސެމްބަރު 27 ވަނަ ދުވަހާ ހަމައަށް އިތުރުކޮށްފައިވާ ކަމަށާއި މުއްދަތު އިތުރުކޮށްފައިވަނީ ގިނަ ފަރާތްތަކެއްގެ އެދިލެއްވުމުގެ މަތިން ކަމަށެވެ.

އެމްއެމްޕީއާރުސީން ބުނީ މި މުބާރާތަކީ ރެޑް ބުލް އާއި ގުޅިގެން ބާއްވާ ދެ ވަނަ ފޭސްބުކް ވީޑިއޯ މުބާރާތް ކަމަށާއި މި މުބާރާތަކީ ރާއްޖޭގައި ފަތުރުވެރިންނަށް ތަޖުރިބާ ކުރުމުގެ ފުރުސަތު ލިބޭ ތަފާތު ކަންކަމުގެ މައްޗަށް ތައްޔާރު ކުރާ 1 މިނެޓުގެ ވީޑިއޯ ކްލިޕް ހުށައެޅުމަށް ބާއްވާ މުބާރާތެއް ކަމަށެވެ.

މުބާރާތުގައި ސާފްކުރުމާއި ސްނޯކުލިންގ ފަދަ ކަންތައްތައް ހިމަނައިގެން ވީޑިއޯ ތައްޔާރު ކުރުމުގެ ފުރުސަތު ހުޅުވާލާފައިވާއިރު އެ މުބާރާތް ބޭއްވުމުގެ މަޤްސަދަކީ ފަތުރުވެރިންނަށް ތަޖުރިބާ ކުރެވެން ހުރި ކަންކަން މާކެޓް ކުރުން ކަމަށް ވެސް އެމްއެމްޕީއާރްސީ އިން ބުނެއެވެ.

މި މުބާރާތުގައި އެންމެ މޮޅު ވީޑިއޯ ތައްޔާރުކޮށް ހުށައަޅާ ފަރާތަކަށް އެއްލައްކަ ވިހި ހާސް ރުފިޔާ ހުށައަޅާފައިވާ އިރު، އެންމެ މޮޅު 10 ވީޑިއޯ އެމްއެމްޕީއާރުސީގެ އޮފިޝަލް ޓުވިޓަރ ޕޭޖުގައި ފީޗާ ކުރުމަށް ވަނީ ނިންމާފައެވެ. އަދި މުބާރާތައް ވީޑިއޯ ހުށައަޅަން ބޭނުންވާ ފަރާތްތަކުން ވީޑިއޯ ހުށައެޅުމަށް ހަމަޖެހިފައި ވަނީ ވިޒިޓް މޯލްޑިވްސް ވެބްސައިޓު މެދުވެރިކޮށް ކަމަށް އެ ކުންފުނިން ވަނީ ބުނެފައެވެ.

އެމްއެމްޕީއާރްސީގެ ފަރާތުން މިދިޔަ އަހަރު ވެސް މި މުބާރާތް ބާއްވާފައިވާއިރު އޭރު މުބާރާތަށް 46 ވީޑިއޯ އާންމުން ވަނީ ހުށައަޅާފައެވެ.