ޔުނައިޓެޑް ފުޑް ސަޕްލައިސްގެ ފަރާތުން ބޭކަރީ އަށް އިތުރު އުފެއްދުންތައް ތައާރަފުކޮށް ކަސްޓަމަރ ލޯޔަލިޓީ ކާޑް ތައާރަފުކޮށްފިއެވެ.
ހޮނިހިރު ދުވަހުގެ ރޭ ޔުނައިޓެޑުން ތައާރަފުކޮށްފައި ވަނީ ސުވިޒަލޭންޑްގެ މަޝްހޫރު ހީސްޓޭންޑް ބުރޭންޑްގެ ބޭކަރީ އުފެއްދުންތަކެވެ. އެ އުފެއްދުންތަކުގެ ތެރޭގައި އެކި ވައްތަރު ބަނަހާ ޕަފް ހިމެނެއެވެ.
ޔުނައިޓެޑް ފުޑް ސަޕްލައިސްގެ އެސިސްޓަންޓް މެނޭޖަރ ހަސަން ސައީދު ވިދާޅުވީ ލޯޔަލިޓީ ކާޑު ތައާރަފުކުރުމުގެ މަޤްސަދަކީ އެ ފިހާރަ އަށް ގަވާއިދުން އަންނަ ކަސްޓަމަރުންނަށް ޑިސްކައުންޓެއް ދިނުން ކަމަށާއި މި ޕްރޮގްރާމްގައި ބައިވެރި ވެވޭނީ 500 ރުފިޔާއަށްވުރެ މަތިން ވިޔަފާރި ކުރާ ފަރާތްތަކަށް ކަމަށެވެ. އަދި ކާޑުގެ މުއްދަތަކީ އެއްއަހަރު ކަމަށް ވެސް ސައީދު ވިދާޅުވިއެވެ.
ޔުނައިޓެޑުން ހީސްޓޭންޑް ބުރޭންޑްގެ ބޭކަރީ އުފެއްދުންތައް ތައާރަފުކޮށްފައި ވާއިރު އެ ބްރޭންޑްގެ އުފެއްދުންތައް ދުނިޔޭގެ އެކި ޤައުމުތަކުން ލިބެން ހުރެއެވެ.
ޔުނައިޓެޑުން ރާއްޖެއަށް އެތެރެކުރާ ޕްރިމިއަމް އުފެއްދުންތަކަށް ހާއްސަކޮށްގެން ހިތަށް ފިނިވާމަގުގައި ހުޅުވާފައިވާ ފިހާރަ އިން ޕްރެޝް ސެލެޑް، ސޭންޑްވިޗް، ޕަނީނީ އަދި އަރަގު ކޮފީ ލިބެން ހުންނާނެއެވެ.
ޔުނައިޓެޑް ފުޑް ސަޕްލައިސްގެ ފަރާތުން ވަނީ އެ ފިހާރައިގެ ޕްރޮޑަކްޓްތަކުގެ ރަހަބެލުމުގެ ހަރަކާތެއް މި އަހަރުގެ އޮކްޓޯބަރު މަހު ކުރިއަށް ގެންގޮސްފައެވެ.
