ފިލިޕީންސްގެ ކުރީގެ ރައީސް ފާޑިނެންޑް މާކޮސްގެ އަނބިކަބަލުން އިމެލްޑާ މާކޮސަ ހައްޔަރުކުރުމަށް އެގައުމުގެ އެންޓިކޮރަޕްޝަން ކޯޓުން އަމުރު ނެރެފިއެވެ.

އުމުރުން 89 އަހަރުގެ އިމެލްޑާ ހައްޔަރުކުރުމުގެ އަމުރުނެރެފައި ވަނީ މެނީލާގެ ގަވަރުނަރުކަމުގެ މަގާމުގައި ހުރި ދުވަސްވަރު ނަހަމަ ގޮތުގައި އަމިއްލަ ފާއިދާއަށްޓަކައި 200 މިލިއަން ޑޮލަރުގެ ބޭންކް ޓްރާންސްފާގެ އިތުރުން ހިޔާނާތުގެ މައްސަލަތަކެއް އެކަމަނާގެ މައްޗަށް ސާބިތުވެފައި ވާތީއެވެ.

ކޮރަޕްޝަންގެ އެ އަމަލުތައް ހިންގާފައި ވަނީ އެކަމަނާގެ އަވަހާރަވެފައިވާ ފިރިކަލުން ފާޑިނެންޑް މާކޯސްގެ ވެރިކަމުގައި 1970 ވަނަ އަހަރުއެވެ.

އެކަމަނާގެ މައްޗަށް ހަތް މައްސަލައެއްގައި ހުކުމްކޮށްފައިވާއިރު، މިއިން ކޮންމެ މައްސަލައެއްގައި ހަ އަހަރާއި 11 އަހަރާ ދެމެދުގެ މުއްދަތަކަށް ޖަލަށް ލުމަށް ވަނީ ހުކުމް ކޮށްފައެވެ. އެހެންނަމަވެސް މި މައްސަލަތައް އިސްތިއުނާފަށް ހުށައެޅުމުގެ ފުރުސަތު އަދިވެސް އެބައޮތް ކަމަށް އެސިސްޓެންޓް ޕޮރްސިކިއުޓާ ޖެނެރަލް ވަނީ ހުކުރު ދުވަހު ވިދާޅުވެފައެވެ.

މި މައްސަލައިގެ ޝަރީއަތުގެ ފުރަތަމަ ބޭއްވި އަޑުއެހުމުގައި އިމެލްޑާގެ ފަރާތުން އެއްވެސް ބޭފުޅަކު ކޯޓަށް ހާޒިރެއް ނުވެއެވެ. 

މުއްސަނދި ދިރިއުޅުމަށް ލޯބިކުރައްވާ އިމެލްޑާގެ މިލްކިއްޔާތުގައި 10 ބިލިއަން ޑޮލަރު ހުރި ކަމަށް ދަ ގާޑިއަން ނިއުސްއިން ވަނީ ރިޕޯޓްކޮށްފައިއެވެ.