ރައްޔިތުންނަށް ދެމުން ގެންދާ ހިދުމަތްތައް އިތުރަށް ލުއި ފަސޭހަ ކޮށްދިނުމަށްޓަކައި މިނިސްޓްރީ އޮފް ފިނޭންސް އެންޑް ޓްރެޜަރީއިން ބީލަން ޕޯޓަލް އާއި ނީލަން ޕޯޓަލް ތައާރަފުކޮށްފިއެވެ.
ބީލަން ޕޯޓަލް މެދުވެރިކޮށް ބީލަންވެރިންނާއި ބީލަމާއި ގުޅޭ މައުލޫމާތު ފަސޭހަކަމާއެކު އެ ޕޯޓަލް މެދުވެރިކޮށް ދައުލަތުގެ އޮފީސްތަކުން ބީލަމަށް ހުޅުވާލައިގެން ކުރިއަށް ގެންދާ މަޝްރޫއުތަކުގެ މައުލޫމާތު ލިބިގެންދާނެއެވެ. އަދި ނޭޝަނަލް ޓެންޑަރ މެދުވެރިކޮށް ބީލަމަށް ހުޅުވާލެވޭ މަޝްރޫއުތަކުގެ ބީލަމާއި ގުޅޭ އެންމެހައި ލިޔެކިއުންތަކާއި އެ ބީލަންތަކުގައި ރަޖިސްޓްރީވުމުގެ ފުރުސަތު އެ ޕޯޓަލް މެދުވެރިކޮށް ހުޅުވާލާނެ ކަމަށް ވެސް އެ މިނިސްޓްރީން ބުންޏެވެ. ދައުލަތުގެ ޕްރޮކިއުމަންޓް ނިޒާމް ހަރުދަނާ ގޮތެއްގައި ދައުލަތުގެ އޮފީސްތަކުން ހިންގުމަށްޓަކައި އެ އޮފީސްތަކަށް ބޭނުންވާ ޕްރޮކިއުމަންޓާއި ގުޅޭ މުހިންމު މައުލޫމާތު އެ ޕޯޓަލް މެދުވެރިކޮށް ފޯރުކޮށް ދެވިގެންދާ ނެއެވެ.
ނީލަން ޕޯޓަލް މެދުވެރިކޮށް މުއައްސަސާތަކުގެ ހަރު މުދަލުގެ އިންވެންޓްރީ ބެލެހެއްޓުމަށް ފަސޭހަވެގެންދާނެ ކަމަށާއި އެ ޕޯޓަލްގެ ފުރަތަމަ ފޭސްގައި ދައުލަތުގެ އެއް މުއައްސަސާ އިން އަނެއް މުއައްސަސާ އާއި ދެމެދު ދައުލަތުގެ ހަރު މުދަލާއި ގުޅުންހުރި މުއާމަލާތު ކުރެވި، ދައުލަތުގެ އެއް މުއައްސަސާއަކުން އިތުރަށް ބޭނުންވާ ހަރު މުދަލެއް އެހެން މުއައްސަސާއަކަށް ބޭނުންވޭތޯ ބެލޭނެ ކަމަށް މިނިސްޓްރީން ބުނިއެވެ. އަދި ޕޯޓަލްގެ ދެވަނަ ފޭސްގައި އަހަރު ނިމުމުގެ ކުރިން އާންމުންނަށް ހުޅުވާލެވި ދައުލަތަށް ބޭނުންނުވާ ހަރު މުދާ ނީލަން ކިޔުމަށް ހުޅުވާލާނެ ކަމަށް ވެސް މިނިސްޓްރީން ވަނީ ފާހަގަކޮށްފައެވެ.
ފިނޭންސް މިނިސްޓަރ އަހްމަދު މުނައްވަރު ވިދާޅުވީ އިފްތިތާހު ކުރެވުނު ހިދުމަތްތަކުގެ ސަބަބުން ހާމަކަން ބޮޑު ގޮތެއްގައި ޑިޖިޓަލް ޕްލެޓްފޯމް މެދުވެރިކޮށް ދެފުށް ފެންނަ ނިޒާމެއްގެ ދަށުން މަސައްކަތް ކުރެވިގެންދާނެ ކަމަށާއި ހިދުމަތް ހޯދަން ބޭނުންވާ ފަރާތްތަކަށާއި ހިދުމަތްދޭ ފަރާތަށް އެތައް ގުނައެއް ލުއިވެގެންދާނެ ކަމަށެވެ.
މީގެ އިތުރުން އެ މިނިސްޓްރީން ވަނީ ބަނޑޭރި ޕޯޓަލް އިތުރު ދެ ހިދުމަތާއެކު ތައާރަފުކޮށްފައެވެ.
