އެމެރިކާގެ އެޓަރނީ ޖެނެރަލް ޖެފް ސެޝަން އިސްތިއުފާދެއްވައިފިއެވެ.
ޤާނޫނު ހަދާ މަޖިލީހުގެ ކުރީގެ މެމްބަރު އިސްތިއުފާ ދެއްވުމަން ނިންމެވިކަން އެންގެވި ސިޓީ ބުދަ ދުވަހު ވަނީ ރައީސް ޑޮނަލްޑް ޓްރަމްޕްއަށް ފޮނުއްވާފައެވެ.
"އަޅުގަނޑުމެން އެޓަރނީ ޖެނެރަލް ޖެފް ސެޝަން ކޮށްދެއްވި ޚިދުމަތަށް އެމަނިކުފާނަށް ޝުކުރު ދަންނަވަން އަދި އެމަނިކުފާނަށް ހެޔޮގޮތްތަށް އެދެން" އެ މަގާމަށް ވަރަށް އަވަހަށް ބޭފުޅަކު ހޮއްވަވާނެކަންވެސް އިއުލާނުކުރައްވައި ރައީސް ޓްރަމްޕް ކުރެއްވި ޓްވީޓްގައި ވިދާޅުވެފައިވެއެވެ.
ޓްރަމްޕް ވިދާޅުވީ އައު ބޭފުޅަކު އައްޔަން ކުރެވެންދެން ސެޝަންގެ ޗީފް އޮފް ސްޓާފަކަށް ހުންނެވި ޖީ ވިޓެކަރ އެކްޓިންގ އެޓަރނީ ޖެނެރަލްކަމަށް ވަޑައިގަންނަވާނެކަމަށެވެ.
ސެޝަންގެ އިސްތިއުފާގެ ސިޓީގެ ކޮޕީތައް އެމެރިކާގެ މީޑިއާގައި ފުޅާދާއިރާއެއްގައި ދައުރުވެފައިވެއެވެ.
އެ ސިޓީގައި ސެޝަން ވިދާޅުވެފައިވަނީ ގާނޫނު ތަންފީޒުކުރުމުގެ މަސައްކަތުގައި އުޅުއްވެވުނުކަމީ ޝަރަފެއްކަމަށެވެ.
އަދި އޭގެ ތެރެއިން އިމިގްރޭޝަން ކަންކަން ތަންފީޒުކުރުމަށް އެ މުއައްސަަސާއިން ކުރަން ޖެހޭ ކަންކަން ކުރެއްވިއްޖެކަމަށްވަނީ ވިދާޅުވެފައެވެ.
ސެޝަންއަކީ ރެފިއުޖީން އެގައުމަށް ވަނުން މަނާކުރުމަށް ރައީސް ޓްރަމްޕް ގެންގުޅުއްވާ އެޖެންޑާ ތަންފީޒުކުރެއްވުމުގައި އެންމެ އިސްދައުރެއް އަދާކުރައްވާ އެއް ފަރާތެވެ.
