ލަންކާގެ ބޮޑުވަޒީރުގެ މަޤާމުން ރަނިލް ވިކްރަމަސިންހަ ދުރުކޮށް، އެމަޤާމަށް ކުރީގެ ރައީސް މަހިންދަ ރާޖަޕަކްސަ އައްޔަންކުރެއްވި މައްސަލައިގައި އެޤައުމުގެ ސިޔާސީ މަސްރަހު ހަލަބޮލިވެ، ދުސްތޫރީ މައްސަލަތަކެއްގެ ތެރެއަށް ވެއްޓިފައި ވަނިކޮށް ރާޖަޕަކްސަ އެމަނިކުފާނުގެ ކެބިނެޓް އާދިއްތަ ދުވަހު އިއުލާންކުރައްވާނެ ކަމަށް މައުލޫމާތު ލިބިއްޖެއެވެ.

އައު ކެބިނެޓް ހުވައި ކުރައްވާނީ ޕްރެޒިޑެންޝަލް ސެކްރެޓޭރިއޭޓްގައެވެ. އަދި ވަޒީރުންގެ މަޖިލީހަށް ގެންނާނެ ޤާނޫނު ހަދާ މަޖިލީހުގެ މެމްބަރުންގެ ލިސްޓް ބޮޑުވަޒީރު މަހިންދަ ރާޖަޕަކްސައާއި ރައީސް މަތިރިޕާލާ ސިރިސޭނާ އެކުލައްވާލައްވަމުން ގެންދަވާ ކަމަށް މައުލޫމާތު ލިބެއެވެ. 

ސަރުކާރު އެކުލަވާލުމުގެ މަސައްކަތް ކުރިއަށްދާއިރު، ރާޖަޕަކްސައަށް މަރުޙަބާ ދަންނަވައި، އެންމެ ފުރަތަމަ ބައްދަލުކުރެއްވި ބޭފުޅުންގެ ތެރޭގައި ޗައިނާއިން ލަންކާއަށް ކަނޑައަޅާފައިވާ ސަފީރު ހިމެނިވަޑައިގަންނަވައެވެ. 2015 ވަނަ އަހަރުގެ ރިޔާސީ އިންތިޚާބުގައި ލަންކާގެ ރައްޔިތުން ރާޖަޕަކްސައަށް ނޫނެކޭ ބުނި އެއް ސަބަބަކީ ޗައިނާއާއި އެކު ބާއްވަމުން ދިޔަ ގާތް ގުޅުމާއި، ޗައިނާއަށް ބޮޑެތި އަދަދުތަކުން ދެރުމެވެ. 

އަނެއްކޮޅުން ބޮޑުވަޒީރުކަމުން ދުރުކުރެވުނު ރަނިލް ވިކްރަމަސިންހަ އަދިވެސް ވިދާޅުވަމުން ގެންދަވަނީ އެމަނިކުފާނަކީ ލަންކާގެ ޤާނޫނު އަސާސީ ބުނާ ގޮތުން ބޮޑުވަޒީރުކަަމަށާއި، ރާޖަޕަކްސަ ބޮޑުވަޒީރުކަމަށް އައްޔަންކުރުން ބަލައިނުގަންނަވާކަމަށެވެ. އަދި ރަނިލް އާއި އެމަނިކުފާނުގެ ޔުނައިޓެޑް ނޭޝަނަލް ޕާޓީ (ޔޫއެންޕީ) އަށް އަދިވެސް ޤާނޫނު ހަދާ މަޖިލީހުގެ މެޖޯރިޓީ އޮތްކަމަށް އެބޭފުޅުން ވިދާޅުވަމުން ގެންދަވާއިރު، ރަނިލް އަދިވެސް މަސައްކަތްކުރައްވަމުން ގެންދަވަނީ ބޮޑިވަޒީރުގެ އޮފީސް ޓެމްޕަލް ޓްރީސްގައެވެ. އެމަނިކުފާނު ވަނީ ހޮނިހިރު ދުވަހު ޓެމްޕަލް ޓްރީސްގައި ލަންކާގައި ތިއްބަވާ ބޭރުގެ ޑިޕްލޮމެޓުންނާއި ބައްދަލުކުރައްވާފައެވެ. މި ބައްދަލުކުރެވުމުގައި އެމެރިކާ، އިނގިރޭސިވިލާތް، އިންޑިއާ، ޖަޕާން، ކެނެޑާ، އޮސްޓްރޭލިއާ އަދި ވިލާތުގެ އިއްތިޙާދުގެ ޑިޕޮލޮމެޓުން ބައިވެރިވެވަޑައިގަތެވެ. 

ރާޖަޕަކްސައަށް ތާޢީދުކުރާ ޖޮއިންޓް އޮޕޮޒިޝަން އިން ވަނީ އާދިއްތަ ދުވަހުގެ ހެނދުނު 8:00 ގެ ކުރިން ޓެމްޕަލް ޓްރީސްއިން ނިކުމެވަޑައިގަތުމަށް ރަނިލްއަށް މުހުލަތެއް ދީފައެވެ. ޖޮއިންޓް އޮޕޮޒިޝަންގެ ފަރާތުން ވާހަކަ ދައްކަވަމުން ޤާނޫނު ހަދާ މަޖިލީހުގެ މެމްބަރު ވިމާލް ވީރަވަންސަ ވިދާޅުވީ ރަނިލް ޓެމްޕަލް ޓްރީސްއިން ނުކުމެވަޑައިނުގެންފިނަމަ ފިޔަވަޅު އަޅަން ޖެހިދާނެކަމަށެވެ. ހޮނިހިރު ދުވަހުގެ އިރު އޮއްސުނު ފަހުން ޔޫއެންޕީގެ މެމްބަރު އަދި ރަނިލްގެ ކެބިނެޓްގެ ފިނޭންސް މިނިސްޓަރަކަށް ހުންނެވި މަންގަލަ ސަމަރަވީރަ ވިދާޅުވީ ރަނިލްގެ ސެކިއުރިޓީ ކަނޑާލައި، އެމަނިކުފާނު ބޭނުން ކުރެއްވި ވެހިކަލްތައް އަތުލުމަށް ރައީސް ސިރިސޭނާ އަންގަވާފައިވާކަމަށެވެ. 

ސިޔާސީ ހަލަބޮލިކަމުގެ ތެރޭގައި ރައީސް މައިތިރިޕާލާ ސިރިސޭނާ ވަނީ އަންނަ ނޮވެމްބަރު މަހުގެ 16 ވަނަ ދުވަހާއި ހަމަޔަށް ޤާނޫނު ހަދާ މަޖިލިސް ބަންދުކުރައްވާފައެވެ. އަދި ރަނިލް އަށް ތާޢީދު އޮތްނަމަ، ނޮވެމްބަރު 16 ގައި އެކަން ދެއްކެވުމަށް ރަނިލް އަށް ރާޖަޕަކްސަގެ ސަޕޯޓަރުން ވަނީ ގޮވާލާފައެވެ.  ރަނިލް ވަނީ މިހާރު ދިމާވެފައިވާ ދުސްތޫރީ މައްސަލަ ހައްލުކުރުމަށް އާދިއްތަ ދުވަހު ޤާނޫނު ހަދާ މަޖިލިސް ހުޅުވުމަށް ޤާނޫނު ހަދާ މަޖިލީހުގެ ރައީސް ކަރޫ ޖަޔަސޫރިޔާއަށް ގޮވާލައްވާފައެވެ. ބެލެވޭ ގޮތުގައި ޤާނޫނު ހަދާ މަޖިލިސް ބަންދުކުރުމަށް ސިރިސޭނާ ނިންމެވީ ރާޖަޕަކްސައަށް ޤާނޫނު ހަދާ މަޖިލިސް ތެރެއިން ތާޢީދު ހޯދުމަށެވެ. ޔޫއެންޕީއަށް ނިސްބަތްވާ ޤާނޫނު ހަދާ މަޖިލީހުގެ ބައެއް މެމްބަރުން މިހާރުވެސް ވަނީ ރާޖަޕަކްސައަށް ތާޢީދުކުރާކަން ހާމަކޮށްފައެވެ. އޭގެ ތެރޭގައި ހިމެނޭ އެއް މެމްބަރުކަމަށްވާ އާނަންދަ އަތުލުގަމަ ވިދާޅުވީ ޔޫއެންޕީގެ 20 މެމްބަރަކު މިހާރުވެސް ތިބީ ރާޖަޕަކްސައަށް ތައްޔާރަށްކަމަށެވެ. 

ރާޖަޕަކްސަގެ ސަޕޯޓަރުން އުފާ ފާޅުކުރަމުންދާއިރު ޔޫއެންޕީގެ ސަޕޯޓަރުން ގެންދަނީ ސިރިސޭނާއާއި ދެކޮޅަށް ވެރިރަށް ކޮޅުނބުގައި މުޒާހަރާ ކުރަމުންނެވެ.