މާފުށީ ޖަލުގައި ބަންދުކޮށްފައި ހުންނެވި އިރު އެމަނިކުފާނަށް ޒިޔާރަތް ކުރުމަށް އާއިލާގެ ބޭފުޅުން މާފުއްޓަށް ވަޑައިގެންނެވުމުން އަދާ ކުރި މެހެމާންދާރީއާއި ބެހެއްޓި ގާތް ކަމަށް ޝުކުރު އަދާ ކުރެއްވުމަށް ރައީސް މައުމޫން އަބްދުލް ގައްޔޫމު ހޮނިހިރު ދުވަހު މާފުއްޓަށް ވަޑައިގެންފިއެވެ.
ރައީސް މައުމޫން މާފުއްޓަށް ވަޑައިގެންނެވީ އަނބިކަނބަލުން ނަސްރީނާ އިބްރާހީމާއި، ދަރިކަލުން ދުންޔާ މައުމޫނާއި ޔުމްނާ މައުމޫން އަދި ދަނބިދަރިކަލުން މުހައްމަދު ނަދީމާއި އެމަނިކުފާނަށް ތާއީދު ކުރާ ބައެއް ބޭފުޅުންނާއެކުއެވެ.
ރައީސް މައުމޫން ވަނީ މާފުށީ ޖަލުގައި އެމަނިކުފާނު ހުންނެވި އިރު އެކި ގޮތްގޮތުން އާއިލާއަށް އެހީތެރިކަން ފޯރުކޮށްދިން މާފުށީގެ ރައްޔިތުންނާއި ބައްދަލުކޮށް ޝުކުރު ދަންނަވާފައެވެ.
My wife and I, together with Dunya, Yumna and Nadheem made a special visit to Maafushi today in appreciation of the kindness shown by the people to my wife and family members during their numerous trips there to visit me, Faris and Nadheem at Maafushi prison. pic.twitter.com/tl17Mafueo
— Maumoon Abdul Gayoom (@maumoonagayoom) October 20, 2018
މިއަހަރު ފެބްރުއަރީ 1 ގައި ސުޕްރީމް ކޯޓުން ކުރި އަމުރު ތަންފީޒް ނުކޮށް ކުއްލި ޙާލަތު އިއުލާންކޮށް ރައީސް މައުމޫން ވަނީ ހައްޔަރުކޮށްފައެވެ. އަދި އެމަނިކުފާނުގެ މައްޗަށް ޓެރަރިޒަމްގެ ދައުވާވެސް އުފުލިއެވެ. އެގޮތަށް ބަންދުގައި ހުންނަވަނިކޮށް އެމަނިކުފާނުގެ އަނބި ކަނބަލުންނާއި ޢާއިލާ ވަނީ ދޭތެރެ ދޭތެރެއިން ދޫނިދޫ ޖަލަށް ޒިޔާރަތް ކުރައްވާފައެވެ.
