ހުޅުމާލޭ ދެ ވަނަ ފިޔަވަހިން ގޯތި ނުވިއްކުމަށް އިންތިޚާބީ ރައީސް އިބްރާހީމް މުހައްމަދު ސޯލިހް އިލްތިމާސް ކުރައްވައިފިއެވެ.
އެމަނިކުފާނުގެ ފަރާތްޕުޅުން ބުރާސްފަތި ދުވަހު ނެރުއްވާފައިވާ ނޫސްބަޔާނުގައި ވިދާޅުވެފައި ވަނީ ވެރިކަން ބަދަލުވަމުންދާ މި މަރުހަލާގައި އަވަސް އަރުވާލައިގެން އާންމު ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ރިޔާސީ އިންތިޚާބުން ބަލިވެފައިވާ ޕާޓީން ހިންގާ މަޝްރޫއުތަކާއިމެދު ކަންބޮޑުވާ ކަމަށެވެ.
އެ ގޮތުން ހުޅުމާލެއިން 400 ގޯތި ވިއްކުމަށް އުޅޭ އުޅުމުގައި ކޮރަޕްޝަނަށް މަގުފަހިވާ ގޮތަށް ކަންތައްތަކެއް އެބަހުރި ކަމަށާއި އެހެންކަމުން އެ މަޝްރޫއު ކުރިއަށް ގެންދިޔުމަކީ ގާނޫނާ ޚިލާފުކަމެއް ކަމަށް އެމަނިކުފާނު ވިދާޅުވިއެވެ. ގެދޮރުގެ ދަތިކަން އެންމެ ބޮޑަށް ބޭނުންވެފައިވާ ފަރާތްތައް ކަށަވަރު ކުރެވޭނެ ނިޒާމެއް ނެތުމާއި ބިން ވިއްކުމަށް އިއުލާން ކޮށްފައިވަނީ އެކަށީގެންވާ މުއްދަތެއް ނުދީ ކަމަށް ވުުމުން ބިމާބެހޭ ގާނޫނާ ޚިލާފްވާ ކަމަށް ވެސް އެ ނޫސް ބަޔާނުގައި ވަނީ ފާހަގަ ކޮށްފައެވެ.
ހުޅުމާލޭގެ އެ ގޯތިތައް ނުވިއްކަން އެންޓި ކޮރަޕްޝަން ކޮމިޝަނުން އަންގާފައިވާ އިރުވެސް އެއްވެސް ފަރުވާލެއް ނެތި އެ ގޯތި ވިއްކުމަށް މަސައްކަތް ކުރަމުން ގެންދާތީ އެކަން ވަރަށް ހަރުކަށި އިބާރާތުން ކުށްވެރި ކުރާކަމަށް އެ ނޫސް ބަޔާނުގައި ރައީސް ސޯލިހް ވަނީ ވިދާޅުވެފައެވެ.
ސޯލިހު ވަނީ ސަރުކާރުން މިދަނޑިވަޅުގައި ހިންގަން އުޅޭ މަޝްރޫއުތައް އަނެއްކާވެސް ހުއްޓާލުމަށް ތަކުރާރު ކުރައްވާފައެވެ. މީގެ ކުރިން އެ މަނިކުފާނު ވަނީ ވެރިކަން ބަދަލުކުރުމުގެ މި މަރުހަލާގައި ސަރުކާރުން މާލީ ޒިންމާ ވާންޖެހޭ އެއްވެސް މުއާމަލާތެއް ނުހިންގުމަށް ފިނޭންސް މިނިސްޓަރ އަހުމަދު މުނައްވަރަށް ދަންނަވާފައެވެ.
ސަރުކާރުން ވިއްކާލަން އުޅޭ 400 ބިމުގެ މަގްސަަކީ އެޗްޑީސީ އަށް ކޭޝްފްލޯގެ ދަތިތަކެއް ކުރިމަތިވެފައިވާތީ، އެކަމަށް ހައްލެއް ހޯދުމުގެ ގޮތުން ކުރާ ކަމެއް ކަމުގައި ބުނި ނަމަވެސް އެ ބިންތައް ވިއްކުމަށް ނިންމާފައި ވަނީ ނުއަގުގައެވެ. ބިން ވިއްކާގެން އިޔާދަ ނުކުރެވޭވަރުގެ ބޮޑު ގެއްލުމެއް ލިބިދާނެކަމަށް ބުނެ ހައުސިންގް މިނިސްޓްރީއާއި އެޗްޑީސީގެ މުވައްޒަފުންތައް ސޮއިކޮށްފައިވާ ޕެޓިޝަނެއް ވެސް ފިނޭންސް މިނިސްޓްރީ އާއި އޮޑިޓް އޮފީހަށާއި އެންޓި ކޮރަޕްޝަން ކޮމިޝަނަށް ވަނީ ހުށަހަޅާފައެވެ.
