ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަދި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން އަހުމަދު ފާރިސް މައުމޫން ޝަހުސު އޮޅުވާލުމުގެ ކުށުގެ ހުކުމާއި ގުޅިގެން ހައިކޯޓަށް ހުށަހަޅާފައިވާ އިސްތިއުނާފުގެ މައްސަލަ މިހަފްތާގައި ނިންމޭތޯ މަސައްކަތް ކުރައްވާނެ ކަމަށް އެ މައްސަލަ ބައްލަވާ ހައިކޯޓުގެ ފަނޑިޔާރުންގެ ބެންޗުން ވިދާޅުވެއްޖެ އެވެ.

ސަރުކާރު ހިންގާ ޕާޓީ ޕީޕީއެމްގެ ހުއްދަ ހޯދުމެއް ނެތި އެ ޕާޓީގެ ލޯގާ އާއި ދިދަ ބޭނުންކުރިކަން ސާބިތުވާ ކަމަށް ކަނޑައަޅައި ފާރިސްގެ މައްޗަށް ހަތަރު މަހާ 24 ދުވަހަށް ޖަލަށް ލާން ކްރިމިނަލް ކޯޓުން ކުރި ހުކުމާއި ގުޅިގެން ހައިކޯޓުގައި އާދިއްތަ ދުވަހު ބޭއްވި އިސްތިއުނާފު ޝަރީއަތުގެ އަޑުއެހުމުގައި ފަނޑިޔާރުންގެ ބެންޗުގެ އިސް ފަނޑިޔާރު މުހައްމަދު ފައިސަލް ވިދާޅުވީ މިމައްސަލަ ހައިކޯޓުގައި އިސްތިއުނާފު ކޮށްފައިތާ ދުވަސްތަކެއް ވެފައިވާތީ މިމައްސަލަ މިހަފްތާއި ނިންމޭތޯ މަސައްކަތް ކުރައްވާނެ ކަމަށެވެ.

ފާރިސްގެ މިމައްސަލަ ބައްލަވާ ފަނޑިޔާރުންގެ ބެންޗުގެ އިސް ފަނޑިޔާރު ފައިސަލްގެ އިތުރުން ދެން ހިމެނިވަޑައިގަންނަވަނީ ހައިކޯޓުގެ އިސްފަނޑިޔާރު ޝުޖާއު އުސްމާނު އަދި ފަނޑިޔާރު ހަސަން އަލީ އެވެ.

މިއަހަރުގެ ޖުލައިމަހު އިސްތިއުނާފް ކުރުމަށް ހުށަހެޅި މައްސަލައިގެ އަޑުއެހުމެއް އާދިއްތަ ދުވަހު ބޭއްވިއިރު، ފާރިސްގެ ގާނޫނީ ވަކީލުން ދިފާއުގައި 27 ނުކުތާއެއް ފާހަގަ ކުރައްވާފަ އެވެ. 

ނަމަވެސް އާދިއްތަ ދުވަހުގެ ޝަރީއަތުގެ އަޑުއެހުމުގައި އެ ހުރިހާ ނުކުތާއެއް އިއްވުމުގެ ކުރިން އެ ޝަރީއަތުގެ އަޑުއެހުމަށް ކަނޑައެޅާފައިވާ އެއް ގަޑިއިރުގެ ވަގުތު ހަމަވުމާއެކު، ފަނޑިޔާރު ފައިސަލް ވިދާޅުވީ އެ އަޑުއެހުން ނިންމާލައްވާ ކަމަށާއި އަދި އިތުރު އަޑުއެހުމެއް ބެއްވޭނެ ކަމަށެވެ. ދެން އަޑުއެހުމެއް ބޭއްވޭނެ ދުވަހެއް އަންގަވާނެ ކަމަށްވެސް ފަނޑިޔާރު ފައިސަލް ވިދާޅުވި އެވެ.

ފާރިސްގެ ފަރާތުން ހުށަހެޅި 27 ނުކުތާގެ ތެރޭގައި ހިމެނޭ މައިގަނޑު ކަންތައްތަކުގެ ތެރޭގައި ގާނޫނުއަސާސީގެ 17 ވަނަ މާއްދާއާއި 20 ވަނަ މާއްދާގައި ބުނާ ހަމަހަމަކަން ނެތް ކަމަށާއި ޕީޕީއެމްގެ ދިދައާއި ލޯގޯ ބޭނުން ކުރައްވައިގެން އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިހާބުގެ ދުވަސްވަރު ޕީޕީއެމް މެމްބަރުން ނޫން މެމްބަރުން ކެމްޕެއިން ކޮށްފައިވާ ކަމަށެވެ. 

ޕީޕީއެމްގެ ދިދައާއި ލޯގޯ ފާރިސް ބޭނުންކުރިކަމަށް ބުނާ މައްސަލަ ހުށަހަޅާފައިވަނީ ވެސް ހައިސިއްޔަތު ލިބިގެންވާ ބޭފުޅެއް ނޫން ކަމަށްވެސް ފާރިސްގެ ދިފާއުގައި ހުށަހަޅުއްވާފައިވާ ނުކުތާތަކުގައި ވެއެވެ. އެމައްސަލަ ހުށަހަޅާފައިވަނީ ޕީޕީއެމްގެ ނާއިބު ރައީސްގެ ހައިސިއްޔަތުން އަބްދުއްރަހީމް އަބްދުﷲ އެވެ. ފާރިސް ވިދާޅުވަނީ ޕީޕީއެމްގެ ނާއިބު ރައީސްކަމުގެ މަގާމުން އަބްދުއްރަހީމް ވަކިކުރައްވާފައިވަނިކޮށް، އެފަދަ މައްސަލައެއް އޭނާއަށް ހުށަހެޅުމުގެ ހައިސިއްޔަތެއް ނެތް ކަމަށެވެ.

މީގެއިތުރުން ކްރިމިނަލް ކޯޓުން އެ ޝަރީއަތް ހިންގިއިރު، ދިފާއީ ބައެއް ހެކީން ހާޒިރުކޮށްފައި ނުވާކަމަށާއި، ދައުލަތުން ހުށަހެޅި ހެކީންގެ ހެކިބަހުގައި އޮޅުވާލުންތަކާއި ދޮގު މައުލޫމާތު ހުރި ކަމަށް ދިފާއީ ނުކުތާތަކުގައި ފާހަގަކޮށްފައި ވެއެވެ. އަދި ހެކިބަސް ނަގާފައިވަނީ ސިއްރުން ކަމަށާއި ބައެއް ކިތާބީ ހެކިތައްވެސް ސިއްރުކޮށްފައިވާތީ އެކަށީގެންވާ ފުރުސަތާއި ވަސީލަތްތައް ލިބިފައި ނުވާކަމަށްވެސް ފާރިސްގެ ދިފާއީ ނުކުތާތަކުގައި ފާހަގަ ކުރައްވާފައި ވެއެވެ.

ޝަހުސު އޮޅުވާލި ކަމަށްބުނާ މައްސަލައިގައި ދިފާއުގައި ދެއްކި ވާހަކަތަކަށް ރިޔާއަތްކޮށްފައި ނުވާކަމަށާއި، އެހުކުމަކީ ކުރިން ލިޔެވިފައިވާ ހުކުމެއް ކަމަށް ގަބޫލު ކުރެވޭ ކަމަށްވެސް ފާރިސްގެ ދިފާއުގައި ހައިކޯޓަށް ހުށަހެޅުއްވި 27 ނުކުތާގައި ފާހަގަ ކުރައްވާފައި ވެއެވެ.

ފާރިސްގެ މައްޗަށް އެ ހުކުމް ކޮށްފައި ވަނީ މިދިޔަ ޖޫން މަހުގެ 27 ވަނަ ދުވަހުގެ ރޭ ކްރިމިނަލް ކޯޓުގެ ގާޒީ އިބްރާހިމް އަލީއެވެ.

ފާރިސްގެ މައްޗަށް އިއްވި ހުކުމުގައި ވަނީ ޕީޕީއެމް އިން ފާރިސް ވަކިކޮށްފައި ވަނިކޮށް އެ ޕާޓީގެ މުސްތަޝާރު ރައީސް އަބްދުﷲ ޔާމީނާއި އެ ޕާޓީގެ ކައުންސިލް މެމްބަރުންގެ ހުއްދަ ނެތި ނޫސްވެރިންގެ ބައްދަލުވުމެއްގައި ފާރިސް ޕީޕީއެމްގެ ލޯގޯ އާއި ދިދަ ބޭނުން ކޮށްފައިވާކަން އެކަށީގެންވާ ޝައްކެތް ނެތް މިންވަރަށް ޝަރީއަތަށް ސާބިތުވާ ކަމަށެވެ.

މި މައްސަލަ ފާރިސްގެ މައްޗަށް ސާބިތު ކުރުމަށް ދައުލަތުން ސިއްރު ތިން ހެކިވެރިޔަކާއި، ފާރިސް ޕާޓީން ވަކިކުރިކަން ސާބިތު ކުރުމަށް އިލެކްޝަންސް ކޮމިޝަނުގެ ސިޓީއެއްގެ އިތުރުން ފާރިސް ޕީޕީއެމްގެ ދިދަ އާއި ލޯގޯ ބޭނުން ކުރި ކަމަށް ބުނާ ނޫސްވެރިންގެ ބައްދަލުވުމުގެ ރެކޯޑިންގއެއް ހުށަހަޅާފައިވެއެވެ. އަދި ފާރިސް މި ދައުވާއިން ދިފާއުވުމަށް 47 މީހަކު ހެކީގެ ގޮތުގައި ހުށަހެޅިއިރު 27 ކިތާބީ ހެއްކެއް ހުށަހެޅިއެވެ. ނަމަވެސް ހެކިބަސް ނެގީ ހަ މީހެއްގެއެވެ.