މިމަހު 23 ގައި ބޭއްވި ރިޔާސީ އިންތިޚާބު، ކާމިޔާބު ކުރެއްވި ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ނޮވެމްބަރު 11 ގައި ރައީސް ކަމުގެ ހުވާކުރެއްވޭނެ ގޮތް ހަމަޖައްސަވައި ދެއްވުމަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު ގޮވާލައްވައިފި އެވެ.
ނޮވެމްބަރު މަހުގެ 11 ވަނަ ދުވަހުން ފެށިގެން އާ ރިޔާސީ ދައުރު ގުނަމުން އައި ނަމަވެސް، ރައީސް އަބްދުﷲ ޔާމީންގެ ފުރަތަމަ ރިޔާސީ ދައުރު ނިމޭނީ އަންނަ ނޮވެމްބަރު މަހުގެ 17 ގައި ކަމަށް އިލެކްޝަންސް ކޮމިޝަނުން ވަނީ ބުނެފަ އެވެ.
އިލެކްޝަން ކޮމިޝަނުން މިހެން ބުނެފައިވަނިކޮށް އެ ކޮމިޝަންގެ ކުރީގެ ރައީސް ފުވާދު ތައުފީޤް ކުރެއްވި ޓްވީޓެއްގައި ވިދާޅުވެފައިވަނީ ރައީސް ޔާމީންގެ ރިޔާސީ ދައުރު ފެށިފައި ވަނީ ނޮވެމްބަރު 11، 2013 ގައި ކަމަށް އިލެކްޝަންސް ކޮމިޝަނުން އޭރު އިއުލާން ކޮށްފައިވާ ކަމަށެވެ. އަދި އެ އިއުލާނުގެ ކޮޕީ ވެސް ފުވާދު ވަނީ ޓްވީޓް ކުރައްވާފައެވެ.
ފުވާދުގެ މި ޓްވީޓަށް ޖަވާބު ދެއްވައި، ރައީސް ވަހީދު ވިދާޅުވީ 2013 ވަނަ އަހަރުގެ ރިޔާސީ ދައުރު ފެށުން ލަސްވީ ދިމާވި ހާލަތްތަކެއްގެ ސަބަބުންކަމަށެވެ. މި އަހަރުގެ ނޮވެމްބަރު 11 އަކީ ދިވެހި ޖުމްހޫރިއްޔާއަށް 50 އަހަރު ފުރޭ ދުވަސްކަން ފާހަގަކުރައްވައި ރައީސް ވަހީދު ވިދާޅުވީ ރައީސް ޔާމީންގެ ސިޔާސީ ތަޖުރިބާ އާއި ހެޔޮވިސްނުންފުޅުގެ ތެރެއިން ނޮވެމްބަރު 11 ގައި އިބޫ ރައީސް ކަމުގެ ހުވާ ކުރެއްވުމުގެ ފުރުސަތުދޭން ޖެހޭ ކަމަށެވެ.
Considering this fact and the unavoidable circumstances under which elections got delayed few days in 2013, I urge HEP Yameen to find in his wisdom and generosity to hold swearing in of the President Elect Ibrahim Mohamed Solih on 11 Nov 2018, 50th Anniversary of the Republic.
— Mohamed Waheed (@DrWaheedH) September 27, 2018
މިދިޔަ އާދީއްތަ ދުވަހު ކުރިއަށް ދިޔަ ރިޔާސީ އިންތިހާބުގައި 233،877 ފަރާތަކުން ވަނީ ނިކުމެ ވޯޓްލާފައެވެ. އެ ގޮތުން އިދިކޮޅު ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހަށް 134،616 ވޯޓް ލިބުނު އިރު، އެމަނިކުފާނާ ވާދަ ކުރެއްވި ރައީސް އަބްދުﷲ ޔާމީނަށް ލިބިފައި ވަނީ 96،132 ވޯޓެވެ.
