ފެނަކަ ކޯރޕަރޭޝަން އެޑްމިނިސްޓްރޭޝަންގެ މުވައްޒިފުންނަން ހަވީރު ފަހެއްގެ ފަހުން އޮފީހަށް ނުވަދެވޭނެ ކަމަށް އެކުންފުނިން އަންގައިފިއެވެ.

ނިމިދިޔަ ރިޔާސީ އިންތިހާބު ގުޅިފައިވާ ސިޔާސީ ޕާޓީތަކުގެ ކެނޑިޑޭޓް އިބްރާހިމް މުހައްމަދު ސޯލިހު ކާމިޔާބު ކުރެއްވުމާ އެކު ސަރުކާރު ބަދަލުކުރުމުގެ ކަންކަން ކުރިއަށް ގެންދާ މި ދަނޑިވަޅުގައި ފެނަކަ ކޯޕަރޭޝަންގެ މައި އޮފީހުގައި މަސައްކަތް ކުރާ މުވައްޒިފުންނަށް ހަވީރު  5 ގެ ފަހުން ނުވަދެވޭނެ ކަމަށް އަންގާފައި ވަނީ ބުރާސްފަތި ދުވަހުގައެވެ. ސަރުކާރުގެ ކުންފުނިތަކުގެ ލިޔެކިޔުންތައް ނައްތާލަން މަސައްކަތްކުރާ މި ދަނޑިވަޅުގައި ފެނެކައިން މިފަދައިން ނިންމުމުން އެކުންފުނީގެ ގިނަ މުވައްޒިފުން ދަނީ ކަންބޮޑުވުން ފާޅުކުރަމުންނެވެ.

ބުރާސްފަތި ދުވަހު ފެނަކަ ކޯޕަރޭޝަންގެ ޑިރެކްޓަރ ޔުސްރާ އަބްދުﷲ ސޮއިކުރައްވާ އެ ކުންފުނީގެ އެޑްމިނިސްޓްރޭޝަން ޑިޕާޓްމެންޓަށް ފޮނުވާފައިވާ ސިޓީގައި ބުނެފައި ވަނީ، ސެޕްޓެމްބަރ މަހުގެ 27 ވަނަ ދުވަހުން ފެށިގެން 17:00 ގައި އޮފީސް ބަންދުކުރަން ހަމަޖެހިފައިވާ ކަމަށެވެ. އެހެންކަމުން ހަވީރު 16:45 ގެ ކުރިން ސައިން އައުޓް ކުރެއްވުމަށް އެދޭ ކަމަށެވެ.

މީގެ އިތުރުން ހަވީރު 17:00 ގެ ފަހުން މަސައްކަތްކުރަން ޖެހޭ ހާލަތެއް މެދުވެރިވެއްޖެނަމަ، ދުރާލައި އެ ޑިޕާޓްމެންޓްއަށް އަންގަވައިގެން، ޑިޕާޓްމެންޓްގެ ހެޑްގެ ބެއްލެވުމުގެ ދަށުން މަސައްކަތް ކުރިއަށް ގެންދިއުމަށް ވެސް އަންގާފައިވެއެވެ.

ފެނަކައިން މިގޮތަށް ނިންމާފައި ވަނީ ދައުލަތުގެ އެކި އިދާރާތަކުގައި ހުރި ލިޔެކިޔުންތަކަކީ ރައްކާތެރިކޮށް، ބަލަހައްޓަންޖެހޭ އެއްޗެއް ކަމަށާއި ލިޔެކިޔުންތައް ނައްތާލުމަކީ ގާނޫނީ ބޮޑު ކުށަކަށްވާތީ، އެކަމުން ސަލާމަތްވެ ތިއްބެވުމަށް ދައުލަތުގެ އިދާރާތަކުގެ މުވައްޒަފުންނާއި ރައްޔިތުންނަށް އިންތިހާބީ ރައީސް އިބްރާހީމް މުހައްމަދު ސޯލިހު (އިބޫ)ގެ ތަރުޖަމާނު އަދި ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރު މާރިއާ އަހުމަދުދީދީ ގޮވާލާފައި ވަނިކޮށެވެ.