ރައީސް ޔާމީން އިންތިޚާބުން ފެއިލްވީ ލީޑަރޝިޕްގެ އަމިއްލަ އެދުމާހުރެ ކަމަށް ރައީސް ޔާމީން ކެމްޕެއިންގައި ހަރަކާތްތެރިކޮށް ފެނު އަދި މިސަރުކާރުގެ ކުރީގެ ސްޕޯޓްސް ކޮމިޝަނަރ އަހުމަދު ނަޝީދު (ޑޭވް) ބުނެފިއެވެ.
އޭނާ މިއަދު ކުރި ޓްވީޓެއްގައި ލީޑަރ ޝިޕަށް އިޝާރާތްކޮށް ބުނެފައިވަނީ ރިޔާސީ އިންތިޚާބުން ރައީސް ޔާމީން ފެއިލްކޮށްލީ ހަމަ "ކަލޭމެން" ކަމަށެވެ. އަދި މިއީ އަމިއްލަ އެދުމާއި އަންބޮނޑި ބޮޑު ކުރުމުގެ ނަތީޖާ ކަމަށެވެ.
Riyaasee Inthikhaabun RY fail kollee hama kaleymen. Amilla edhumah anbodi bodukurumuge natheejaa mee. Meehaku ikhlaastherivegen hoveynenama RY hovunees. Aharumen assessment hadhai nimmaifin. Zimmaa nagan jeheny leadership ai Madam arihu ulhunu vaki baeh.https://t.co/1Ye2yeXPcF
— 216, 38 & 39 (@TC_Dav) September 24, 2018
ޑޭވް ބުނީ މީހަކު އިޚްލާސްތެރިވެގެން ހޮވޭނެނަމަ ރައީސް ޔާމީން ހޮވުނީސް ކަމަށާއި އެސެސްމެންޓް ހަދައި ނިންމާފައިވާ ކަމަށެވެ.
ޑޭވް ބުނީ ރައީސް ޔާމީން ފެއިލްވުމުގެ ޒިންމާ ނަގަން ޖެހެނީ ލީޑަރޝިޕްއާއި މެޑަމް އަރިހުގައި އުޅުނު ވަކި ބައެއް ކަމަށެވެ.
ޑޭވްގެ އިތުރުން ޕީޕީއެމަށް ނިސްބަތްވާ ރައްޔިތުންގެ މަޖިލީހުގެ ބައެއް މެމްބަރުންވެސް ވަނީ ރައީސް ޔާމިން ފެއިލްވުމަކީ ވަރަށްބޮޑަށް ލީޑަރޝިޕް ލަދުގަންނަން ޖެހޭނެ ކަމެއްކަމަށް ވިދާޅުވެ ލިޑަރޝިޕަށް ފާޑު ވިދާޅުވެފައެވެ.
2013 ވަނަ އަހަރުގެ ރިޔާސީ އިންތިޚާބުގެ ކެމްޕެއިންގައި ރައީސް ޔާމީނަށް ތާއީދު ހޯދައިދިނުމަށް ގިނަ މަސައްކަތްތަކެއް ކުރި ޑޭވް، މި އަހަރުގެ ރިޔާސީ އިންތިޚާބުގެ ކެމްޕެއިން ފެށެން ކައިރިވެފައި ވަނިކޮށް، ޕީޕީއެމްގެ ލީޑަރޝިޕްގައި މިހާރު ތިބި ބައެއް ފަރާތްތަކާއި ޖެހުނު މައްސަލަތަކެއްގެ ސަބަބުން މި އަހަރުގެ ކެމްޕެއިންގައި އެއްވެސް ވަރަކަށް ހަރަކާތްތެރި ވެފައެއް ނުވެއެވެ.
