ރައީސް ނަޝީދު ދިވެހިރައްޔިތުންނާ ވަރަށް އަވަހަށް ބައްދަލުކުރައްވާނެ ކަމަށް އެމްޑީޕީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.
އެމްޑީޕީ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެމްޑީޕީގެ ޗެއަރޕާސަން ހަސަން ލަތީފް ވިދާޅުވީ އިންތިޚާބީ ރައީސް ސަރުކާރާ ހަވާލުވެވަޑައިގަތުމުގެ ކުރިން މަޝްވަރާތައް މިއަދު ފެށިގެންދާނެ ކަމަށާއި، އަދި އެ މަޝްވަރާތަކުގެ ތެރޭގައި ކުރީގެ ރައީސް މުހައްމަދު ނަޝީދު ވީހާ ވެސް އަވަހަކަށް ރާއްޖެ ގެންނަން ކުރަންޖެހޭ މަޝްވަރާކުރެވޭނެ ކަމަށެވެ. އަދި އެކަމާ ގުޅޭ މަޝްވަރާތައް ފެށިފައިވާ ކަމަށް ހަސަން ލަތީފް ވިދާޅުވިއެވެ.
ހަސަން ލަތީފް ވިދާޅުވީ އިންތިޚާބީ ރައީސް ހުވާކުރެއްވުމުގެ ރަސްމިއްޔާތުގައި ރައީސް ނަޝީދު ބައިވެރިވެވަޑައިގަންނަވާނެ ކަމަށެވެ.
”އަޅުގަނޑުމެން އެދެނީ މާދަން ވެސް އަދި މިއަދު ވެސް ރައީސް ނަޝީދު އަޅުގަނޑުމެންނާ އެކީގައި ހުންނެވުން. ރައީސް ޔާމީނަށް އެކަން ނުކުރެވެންވީ އެއްވެސް ސަބަބެއް ނެތް. އެހެންވީމަ އަޅުގަނޑުމެން އެދެމުން ވެސް ދާނަން. އަދި ރައީސް ޔާމީނަށް ދަންނަވަމުން ވެސް ދާނަން. ރައީސް ނަޝީދު ވެސް މިނިވަންކޮށް ދެއްވުމަށް އަދި އެހެން ބޭފުޅުން ވެސް މިނިވަންކޮށް ދެއްވުމަށް،" ހަސަން ލަތީފް ވިދާޅުވިއެވެ.
ރައީސް ޔާމީންގެ ސަރުކާރުން 13 އަހަރުގެ ޖަލު ހުކުމެއް އިއްވާފައިވާ ރައީސް ނަޝީދު ބޭސްފަރުވާއަކަށް އިނގިރޭސިވިލާތަށް ވަޑައިގެންނެވި ގޮތަށް އެ މަނިކުފާނު ދިރިއުޅުއްވަމުން ގެންދަވަނީ އިނގިރޭސިވިލާތުގައެވެ. އިނގިރޭސި ވިލާތުގައި ދިރިއުޅުއްވަމުން ގެންދެވި ނަމަވެސް ގިނައިން އަވަށްޓެރި ސްރީލަންކާއަށް ވަޑައިގެން ރާއްޖޭގައި ސިޔާސީ ފަރާތްތަކާ ބައްދަލުކުރައްވައި ރާއްޖެ އިސްލާހީ މަގަށް ގެނައުމަށް ގެންނަންޖެހޭ މަސައްކަތްތައް އެ މަނިކުފާނުވަނީ ކުރައްވާފައެވެ.
ރައީސް ނަޝީދުގެ އިތުރުން ޖަލު ހުކުމެއް އިއްވާފައިވާ ޖޭޕީގެ ބާނީ ގާސިމް އިބްރާހީމާއި ގައުމުން ބޭރުގައި މި ވަގުތު ތިއްބެވި އެހެން ސިޔާސީ ބޭފުޅުން ވެސް ގައުމަށް ވަޑައިގަންނަވާނެ ކަމަށް ހަސަން ވިދާޅުވިއެވެ.
