ރިޔާސީ އިންތިޚާބުގެ ވޯޓު ގުނުމާއި ނަތީޖާ އިއުލާން ކުރުމުގައި އަމަލު ކުރަންޖެހޭ ގޮތާ ބެހޭ ގޮތުން ތަފާތު ގޮތްގޮތައް ވާހަކަ ދެކެވެމުންދާތީ، އަދި އެކަމާ މެދު ބައެއް ފަރާތްތަކުން ކަންބޮޑުވުން ފާޅު ކުރަމުން ގެންދިއުމާއެކު، އެކަން ސާފުކޮށް ދިނުމުގެ ގޮތުން، 21 ސެޕްޓެމްބަރ 2018 ގައި އިލެކްޝަންސް ކޮމިޝަން އިން ވަނީ ބަޔާނެއް ނެރެފައެވެ. މި ބަޔާނުގައި މިފަހަރުވެސް ވޯޓު ގުނުމާއި ނަތީޖާ އިއުލާން ކުރުމުގައި އެ ކޮމިޝަނުން އަމަލު ކުރާނީ މީގެ ކުރީގެ އިންތިޚާބު ތަކުގައި އަމަލު ކޮށްފައިވާ ގޮތައް ކަމަށް އެ ކޮމިޝަނުން ވަނީ ޔަގީން ކަން ދީފައެވެ. ތިރީގައިވާ ލިޔުމަކީ ހަވާލާދީފައިވާ ބަޔާނުގައި ކަމާބެހޭ ގޮތުން އިލެކްޝަންސް ކޮމިޝަނުން ފާހަގަކޮށްފައިވާ މުހިންމު ނުކުތާތަކެވެ.
- ވޯޓުގުނުމާއި ވޯޓުގެ ވަގުތީ ނަތީޖާ އިޢުލާނުކުރުމުގެ އެންމެހައި ކަންކަން ކުރިއަށްގެންދާނީ ކެންޑިޑޭޓުންގެ ރަސްމީ އިންތިހާބީ އޭޖެންޓުންނާއި، ކެންޑިޑޭޓުންގެ މަންދޫބުންނާއި، އޮބްޒާވަރުންނާއި، މޮނީޓަރުން ވޯޓުލާ މަރުކަޒުގައި ތިބިނަމަ އެމީހުންގެ ހާޒިރުގައިކަން.
- ވޯޓުލާ ނިމުމުން ވޯޓުފޮށި ބަންދުކުރުމަށްފަހު ބޭނުންނުކޮށް އިތުރަށްހުރި ވޯޓުކަރުދާހާއި ކައުންޓަރފޮއިލް އަދި ވޯޓުލުމަށް ބޭނުންކުރެވުނު ހުރިހާ ތަކެއްޗެއް ސެކިއުރިޓީ ސިޓީއުރައަށް ލުމަށްފަހު ބަންދުކުރުން.
- ވޯޓުފޮށިތައް ހުޅުވައި ވޯޓު ގުނުމަށް ވޯޓު ކަރުދާސްކޮޅުތައް މޭޒުމައްޗަށް އޮއްސާލުން.
- ބާތިލް ވޯޓު ކަރުދާހާއި ކޮންމެ ކެންޑިޑޭޓަކަށް ލިބުނު ވޯޓު ކަރުދާސް، ތިން ބަޔަށް އަޅައި، ވަކިކުރުމުގެ މަސައްކަތް ކުރިއަށްގެންދިއުން.
- ފަހަރަކު ވޯޓުކަރުދާސް ކޮޅެއް ނަގައި، ކޮންމެ ކަރުދާސްކޮޅެއް ވަކިން،ހާޒިރުވެތިބި އެންމެނަށް ދެއްކުން. (މިކަންކުރާނެ ތަރުތީބަކީ އެންމެ ފުރަތަމަ ބާތިލް ވޯޓުކަރުދާސް ތައް، ދެވަނައަށް ކެންޑިޑޭޓް ނަންބަރު 1، ތިންވަނައަށް ކެންޑިޑޭޓް ނަންބަރު 2 އަށް ލިބުނު ވޯޓުކަރުދާސް، ވަކި ވަކި ދެއްކުން.)
- ވޯޓު ކަރުދާހެއް ބާތިލުކަމަށް ކަނޑައަޅާނަމަ، އެވޯޓު ކަރުދާސްކޮޅު ބާތިލްކުރާ ސަބަބު ބަޔާންކޮށް، ކިޔައިދިނުން.
- ވޯޓު ކަރުދާސްތައް ދެއްކުމަށްފަހު، ފުރަތަމަ އޮފިޝަލް ވޯޓު ކަރުދާހުގެ އަދަދު އަޑުހަރުކޮށް ގުނުން.
- ފުރަތަމަ އޮފިޝަލް ގުނުމަށްފަހު ދެވަނަ އޮފިޝަލްވެސް އަޑުހަރުކޮށް ވޯޓު ކަރުދާހުގެ އަދަދު ގުނުން.
- ގުނާ ނިމޭ ކޮންމެ 50 ވޯޓު ކަރުދާހެއް ބަންޑެލިކޮށް ބެހެއްޓުން.
- މިއިން ކޮންމެ 50 ގެ ބަންޑެއްޔެއްގެ ލޭބަލް އިންތިހާބީ އޮފިޝަލުން ފުރައި ފުރިހަމަކުރުން.
- ވޯޓު ގުނާ ނިމުމުން، އިލެކްޝަންސް ކޮމިޝަންގެ އޮފިޝަލެއް ވަގުތީ ނަތީޖާ ޝީޓު ގަލަމުން ލިޔެ ފުރައި ފުރިހަމަކުރުން.
- ވޯޓުލާ މަރުކަޒާ ހަވާލުވެހުރި އޮފިޝަލާއި ވޯޓު ގުނުމުގައި އަމަލީގޮތުން ބައިވެރިވި މަދުވެގެން 2 އޮފިޝަލުން ވޯޓުގެ ނަތީޖާ ޝީޓުގައި ސޮއިކުރުން.
- ނަތީޖާ ޝީޓުގައި އޮފިޝަލުން ސޮއިކުރުމަށްފަހު، ވޯޓުގެ ވަގުތީ ނަތީޖާ ރަސްމީކޮށް އިއުލާނުކުރުން.
- އާއްމުންނަށް ފެންނަގޮތަށް ވޯޓުލާ މަރުކަޒުގައި ނަތީޖާ ޝީޓު ހަރުކުރުން.
- ވޯޓުގެ ނަތީޖާ ވޯޓުލާ މަރުކަޒުގައި އާއްމުކޮށް އިއުލާނުކުރުމަށްފަހު މެނުވީ އިލެކްޝަންސް ކޮމިޝަނަށް ވޯޓުގެ ނަތީޖާ ނުފޮނުވުން އަދި ޓެބްލެޓަށް ނޭޅުން.
- ވޯޓުގެ ނަތީޖާ ވޯޓުލާ މަރުކަޒުގައި އާއްމުކޮށް އިއުލާނު ކުރުމަށްފަހު ރަސްމީކޮށް ޓެބްލެޓް މެދުވެރިކޮށް އިލެކްޝަންސް ކޮމިޝަނަށް އެ ނަތީޖާ ފޮނުވުން.
- ވޯޓު ގުނާ އަދި ނަތީޖާ އިޢުލާނުކުރާ މަރުހަލާގައި އިލެކްޓްރޯނިކް ޓެބްލެޓް ބޭނުންކުރެވޭނީ ނަތީޖާ އިޢުލާނު ކުރުމަށްފަހު، ވަގުތީ ނަތީޖާ އިލެކްޝަންސް ކޮމިޝަނަށް ފޮނުވުމަށް އެކަންޏެވެ.
- ވޯޓުގުނުމުގެ މަސައްކަތް ކުރިއަށްގެންދާއިރު، ކޮންމެ މަރުހަލާއެއްގައިމެ، ސުވާލުކުރުމުގެ ހައްގު ހާޒިރުވެ ތިބޭ އެންމެނަށް އޮންނާނެއެވެ. އަދި، ކުރާ ކޮންމެ ސުވާލަކަށް އެކަށީގެންވާގޮތަށް ޖަވާބުދާރީ ވާންޖެހޭނެއެވެ. އަދި، މަސައްކަތް ކުރިއަށް ދިޔަގޮތުގެ ރިޕޯޓުގައި ނޯޓުކުރެވޭނެއެވެ. އަދި، ހައްލުކުރަންޖެހޭ މައްސަލައެއް ފެންމަތިވެއްޖެ ހިނދެއްގައި އެމައްސަލައަށް ވަގުތުން ހައްލެއްހޯދޭނެއެވެ.
