އާދީއްތަ ދުވަހު ބާއްވާ ރިޔާސީ އިންތިޚާބުގައި ވޯޓުލުމަށް ރާއްޖޭގެ ބައެއް ރަށްރަށުގައި ކިޔު ހަދައިފިއެވެ.
އެގޮތުން ހދ. މަކުނުދޫގައި ވަނީ އެރަށު ވޯޓުލާ ސަރަހައްދުގެ ބޭރުގައި ގޮނޑިބަރި ޖަހާފައެވެ. އަދި ދ. ކުޑަހުވަދޫގައި ވެސް ވަނީ ވޯޓުލުމަށް ކިޔު ހަދާފައެވެ.
#IbuFaisal ah vote lumah H.Dh.Makunudhoo ge coalition supporterun queue ah araifi. @Lucasjalyl @SikkaMohoree @Simwarr pic.twitter.com/ZS3lN3lZyZ
— FreeSheikhImran (@FreeSheikhImran) September 20, 2018
އިންތިޚާބުގެ ވޯޓުލުމުގެ ދެ ދުވަސް ކުރިން ބައެއް ރަށްރަށުން ކިޔު ހަދާފައިވާއިރު މިއީ މިހާ ކުރިން ވޯޓުލުމަށް ކިޔު ހެދި ފުރަތަމަ ފަހަރެވެ. މީގެ ކުރިން ވޯޓުލާ ދުވަހުގެ ކުރީ ރޭ ބައެއް ރަށްރަށުގައި ކިޔު ހަދައެވެ.
ރިޔާސީ އިންތިޚާބުގައި އައިޑީކާޑުގެ ނަމްބަރާއި ނަމާއި އެޑްރެސް ހިމެނޭ ގޮތަށް އާއްމުކޮށްފައިވާ ލިސްޓުގައިވާ ގޮތުން 262،135 މީހުންނަށް ވޯޓު ލުމުގެ ހައްގު ލިބިގެންވެއެވެ. މިފަހަރުގެ އިންތިޚާބުގައި ވާދަކުރައްވަނީ ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހު(އިބޫ) އާއި ޕީޕީއެމްގެ ކެންޑިޑޭޓް ރައީސް އަބްދުﷲ ޔާމީނެވެ.
ރިޔާސީ އިންތިޚާބު މޮނިޓަ ކުރަން 10،506 މޮނިޓަރުން ބައިވެރިވާނެއެވެ. ބޭރުގެ މޮނިޓަރުންގެ ގޮތުގައި 34 މީހަކު ބައިވެރިވާ ކަމަށް އިލެކްޝަނުން ބުނެފައިވާ އިރު ދައުވަތު ދީގެން ބޭރުގެ އޮބްޒާވަރުންގެ ގޮތުގައި 25 މީހަކު ބައިވެރިވާނެ ކަމަށް އިލެކްޝަންސް ކޮމިޝަނުން ބުނެއެވެ. އަދި އޮފިޝަލުންގެ ގޮތުގައި 1895 މީހުން ހަރަކާތްތެރިވާނެއެވެ. އިލެކްޝަން ކަވަރުކުރުމަށް ބޭރުގެ މީޑިއާތަކަށް އިލެކްޝަނުން ހުއްދަ ދިން ނަމަވެސް ގިނަ މީޑިއާތަކުގެ މީހުންނަށް އިމިގްރޭޝަނުން ވިސާ ދޫކޮށްފައެއް ނުވެއެވެ.
