އިންތިހާބުގައި ބޭނުންކުރާ ޓެބްލެޓާއި ބައެއް ޑޮކިއުމެންޓްތައް ޕީޕީއެމްގެ ޖަގަހައެއްގައި ހަވާލުކުރާ ކަމަށް ބުނާ ފޮޓޯތަކެއް އާންމުވެއްޖެއެވެ.
ސޯޝަލް މީޑީއާގައި ދައުރުވާ މި ފޮޓޯތަކުން ފެންނަނީ ފެކްކޮށްފައި ހުރި ކަރުދާސްތަކެއްގެ އިތުރުން ޓެބްލެޓެކެވެ. އޭގައި ޖަހާފައި ވަނީ ށ. ފޯކައިދޫއެވެ.
އިލެކްޝަންސް ކޮމިޝަނުގެ މެންބަރު އަހުމަދު އަކްރަމު ވިދާޅުވީ، އެއީ އިލެކްޝަންސް ކޮމިޝަނުގެ ލިޔެކިއުންތަކެއް ނޫން ކަމަށެވެ. އިލެކްޝަންސްގެ ލިޔެކިޔުންތައް ހުންނާނީ ބަންދުކޮށްފައި ކަމަށާއި އެތަކެތި ނުކެނޑޭނެ ކަމަށް އަކްރަމް ވިދާޅުވިއެވެ. ނަމަވެސް އެފޮޓޯތަކުގައި ތިބީ އޮފިޝަލުންކަން ނުވަތަ ނޫންކަން ކަށަވަރު ނުކުރެވޭ ކަމަށް އަކްރަމް ވިދާޅުވިއެވެ.
އޮފިޝަލުންގެ ގޮތުގައި އިލެކްޝަންސް ކޮމިޝަނުން ނަގާ ފަރާތްތަކަކީ އެއްވެސް ސިޔާސީ ޕާޓީއަކަށް ނިސްބަތް ނުވާ އަދި ސިޔާސީ ހަރަކާތްތަކުގައި ވެސް ބައިވެރިނުވާ ފަރާތްތަކަށް ވާންޖެހޭނެ ކަމަށް އިސީން ވަނީ ޝަރުތުކޮށްފައެވެ.
މިފަދަ ފޮޓޯތަކެއް އާންމުވެފައިވާ އިރު މިދިޔަ އަންގާރަ ދުވަހު ބޭއްވި ޕީޕީއެމްގެ ޖަލްސާގައި ވެސް އިންތިޚާބުގެ ކަންކަމުގައި ހަރަކާތްތެރިވުމަށް އީސީން ކަނޑައަޅާފައިވާ ބަޔަކު ބައިވެރިވި ކަމަށް ބުނެ ސޯޝަލް މީޑިއާގައި އެފަދަ ވާހަކަތަކެއް ހާމަކޮށްފައި ވެއެވެ. އަދި އެފަދަ ބައެއް މީހުންގެ ފޮޓޯތައް ވެސް އާންމުކޮށްފައި ވެއެވެ.
މީގެ ކުރިން އިލެކްޝަންސް ކޮމިޝަނުން ވަނީ އެއްވެސް އޮފިޝަލަކު ސިޔާސީ އެއްވެސް ހަރަކާތެއްގައި އުޅޭކަން އެނގިއްޖެ ނަމަ އެއޮފިޝަލަކު ވަކިކުރާނެ ކަމަށް ބުނެފައެވެ.
