އަންނަ އާދީއްތަ ދުވަހު ބާއްވާ ރިޔާސީ އިންތިޚާބުގައި ބޭނުންކުރާ ވޯޓު ކަރުދާސްތައް އަތޮޅުތަކަށް މިއަދު ފޮނުވައި ނިމޭނެ ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަނުގެ މެމްބަރު އަހުމަދު އަކްރަމް ވިދާޅުވީ މިމަހުގެ 17 އިން ފެށިގެން އަތޮޅުތަކަށް ވޯޓު ކަރުދާސްތައް ފޮނުވަން ފަށާފައިވާ ކަމަށެވެ.
ވޯޓު ކަރުދާސްތަކާ އެކު، ވޯޓުލުމުގައި ބޭނުންވާ ބައެއް މުހިންމު ލިޔެކިޔުންތަކާއި ސާމާނު ގެންދަނީ ސެކިއުރިޓީ ފޮށިތަކުގައި ކަމަށް އޭނާ ވިދާޅުވިއެވެ. ސެކިއުރިޓީ ފޮށިތައް ރަށްރަށަށް ފޮނުވާއިރު، އިލެކްޝަންސް ކޮމިޝަންގެ އޮފިޝަލުންނާއި ފުލުހުން ވެސް ހަރަކާތްތެރިވާނެ ކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ އަތޮޅުތަކުން މާދަމާ ރަށްތަކަށް ވޯޓު ކަރުދާސްތައް ފޮނުވާ ނިންމާލާނެ ކަމަށެވެ.
"މިއަދު އަތޮޅުތަކަށް ވޯޓު ކަރުދާސްތައް ފޮނުވާ ނިންމާލާނެ. މާދަމާ ހުރިހާ ރަށްތަކަށް ކަރުދާސް ފޮނުވާ ނިންމާލާނެ." އަކްރަމް ވިދާޅުވިއެވެ.
އަދި މިހާތަނަށް ބޭރުގެ އެއްވެސް ގައުމަކަށް ވޯޓު ކަރުދާސް ގެންގޮސްފައިނުވާ ކަމަށް ވެސް އަކްރަމް ވިދާޅުވިއެވެ.
އިންތިހާބުގައި 262135 މީހުން ވޯޓުލުމުގެ ހައްގު ލިބިގެންދާއިރު 472 ވޯޓުފޮށި ބެހެއްޓުމަށް ވަނީ ހަމަޖެހިފައެވެ.
