ސާފް ސުޒުކީ ކަޕް ނުވަތަ ސާފް ޗެމްޕިއަންޝިޕްގެ ޗެމްޕިއަންކަން އިންޑިއާ ބަލިކޮށް ރާއްޖެއިން ހޯދައި، ގައުމީ ޓީމް އެނބުރި ރާއްޖެ އަންނާތީ އަންނަ އަންގާރަ ދުވަސް ބަންދުކޮށްފިއެވެ. 

ރައީސް އޮފީހުން ބުނީ ދިވެހިރާއްޖޭގެ ގައުމީ ފުޓުބޯޅަ ޓީމް ސާފް ސުޒުކީ ކަޕް 2018 ގެ ޗެމްޕިޔަންކަން ހޯދާފައި ވާތީ ގައުމީ ޓީމަށް މަރުޙަބާ ދެންނެވުމަށް ސެޕްޓެންބަރު 18 ވާ އަންގާރަ ދުވަހަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ހަމަޖައްސަވާފައިވާ ކަމަށެވެ. 

ހޮނިހިރު ދުވަހު ބަންގްލަދޭޝްގެ ޑާކާގައި ހުންނަ ބަންގުބަންދު ސްޓޭޑިއަމްގައި ކުޅުނު ފައިނަލް މެޗުގައި ރާއްޖެއިން ވަނީ 2-1 އިން އިންޑިއާ ބަލިކޮށްފައެވެ. 

މިއީ ރާއްޖެ އިން ސަރަހައްދީ ފުޓްބޯޅައިގައި ތަށި ނެގި ދެވަނަ ފަހަރެވެ. ރާއްޖެ މީގެ ކުރިން ޗެމްޕިއަންކަން ހޯދީ 2008 ވަނަ އަހަރުގެ މުބާރާތުގެ ފައިނަލުގައި 1-0 އިން އިންޑިއާ ބަލިކޮށްގެންނެވެ.