ކްލަބް ފްރެންޑްލީއެއްގައި ރެކޯޑު ބަޖެޓަކާއެކު ކުރިޔަށް އޮތް ސިޒަނަށް ނިކުންނަ ނިއުރޭޑިއަންޓް ސްޕޯޓްސް ކްލަބްގެ މައްޗަށް ޓީސީ ސްޕޯޓްސް ކްލަބް ކުރިހޯދައިފި އެވެ.
ހޮނިހިރު ދުވަހުގެ ހަވީރު ކުޅުނު މި މެޗު ނިއުއާ ވާދަކޮށް ޓީސީން ކާމިޔާބުކުރީ 1-2 ގެ ނަތީޖާއަކުންނެވެ.
މާފަންނު ޓާފް ދަނޑުގައި ކުޅުނު މެޗުގައި ދެޓީމުގެ ފަރާތުންވެސް ފެނިގެންގޮސްފައިވަނީ ވާދަވެރި ކުޅުމެކެވެ. އެހެން ނަމަވެސް ޓީސީން ވަނީ މި މެޗުގައި ނިއު ހިފަހައްޓައި އެޓީމުގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ.
މި މެޗުގައި ޓީސީގެ ލަނޑުތަައް ކާމިޔާބުކޮށް ދިނީ މި ސީޒަނުގައި އެޓީމާ އަލަށް ގުޅުނު އަދި ފުރަތަމަ ޑިވިޝަންގައި ވެސް މުޅިން އަލަށް ކުޅޭ ސ.ފޭދޫ ޓީމުން ވިދާލި އިބްރާހިމް މަހުދީ އެވެ. އޭނާ ވަނީ މި މެޗުގައި މޮޅު ކުޅުމެއް ދައްކާފައެވެ.
މެޗުގައި ނިއުގެ ފަރާތުން ފެނިގެންދިޔަ ހަމައެކަނި ލަނޑު އެޓީމަށް ލިބުނު ހިލޭ ޖެހުމަކުން ކާމިޔާބުކޮށްދިނީ ޓީސީ ދޫކޮށްލުމަށްފަހު އެޓީމާ ގުޅުނު އަލީ ފާސިރު (ސެންޓޭ) އެވެ. ސެންޓޭ ވަނީ މިދިޔަ ސީޒަނުގައި ޓީސީ އަށް މޮޅު ކުޅުމެއް ދައްކައި ރާއްޖޭގެ މޮޅު ކުޅުންތެރިޔާގެ މަގާމުވެސް ހޯދާފައެވެ.
ކުރިޔަށް އޮތް ސީޒަނަށް ތައްޔާރުވުމުގެ ގޮތުން ޓީސީންވެސް އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން އެޓީމުން ވަނީ ނޭޕާލްގެ އެއް ނަމްބަރު ކީޕަރު އަދި ބިދޭސީ ފޯވާޑެއްވެސް ގެނެސްފައެވެ. މީގެއިތުރުން ނިއު އިން ވަނީ އެޓީމަށް ބިދޭސީ ކޯޗަކާ، ބިދޭސީ ފިޒިކަލް ޓްރެއިނަރެއް އަދި ބިދޭސީ ހަތަރު ކުޅުންތެރިން ގެނެސްފައެވެ.
