އައްޑޫ ސިޓީގެ މިސްކިތްތަކުގެ އިމާމުންނަށް ސަރުކާރުން ވަޒީފާގެ ބިރު ދައްކަމުން ދާތީ ޢަދާލަތު ޕާޓީގެ ނައިބު ރައީސް އަލްއުސްތާޛް އަލީ ޒާހިރު ކަންބޮޑުވުން ފާޅުކުރައްވައިފިއެވެ.
ހުކުރު ދުވަހު އަލީ ޒާހިރު ކުރެއްވި ޓުވީޓެއްގައި ވިދާޅުވީ އައްޑޫ ސިޓީގައި ސަރުކާރަށް ތާޢީދު ނުކުރާތީ އިމާމުންނަށް ވަޒީފާއިން ވަކިކުރާނެކަމުގެ އިންޒާރު އިސްލާމިކް މިނިސްޓްރީއިން ދެމުންދާކަމަށެވެ. އަދި ޤާނޫނު އަސާސީއާއި ސިވިލް ސަރވިސްގެ ޤާނޫނާއި ވަޒީފާއި ބެހޭ ޤާނޫނާއި ޚިލާފަށް އިމާމުންނަށް ވަޒީފާގެ ބިރު ދައްކަމުންދާތީ އެޖަރީމާ ކުށްވެރިކޮށް، އެކަން ހުއްޓާލުމަށް ގޮވާލައްވާކަމަށް އަލީ ޒާހިރު ވިދާޅުވިއެވެ.
#AdduCity gai sarukaarah thaaeedh nukuraathee Imaamunah vazeefa in vaki kuraane kamuge inzaaru @MVIaffairs in dhemun eba gendhey. QA aai CS, adhi vazeefaa aai behey ganoon aai khilaafah imaamunnah vazeefaage biru dhakkamun dhaathee e jareema kuhverrikoh ekan huttaalumah govaalan.
— Ali Zahir (alipi) (@alixahir) August 17, 2018
ސަރުކާރަށް ތާޢީދުނުކުރާ އިމާމުންނަށް ވަޒީފާގެ ބިރު ދައްކަމުންދާކަމަށް ތުހުމަތުކުރެވޭއިރު، ރައީސް ޔާމީންގެ ރަނިންގމޭޓް ޑރ. މުހައްމަދު ޝަހީމް އަލީ ސަޢީދަށް ތާޢިދުކުރާކަމަށް ބުނެ ބައެއް ދީނީ އިލްމުވެރިން ބޭއްވި ނޫސްވެރިންގެ ބައްދަލުވުމުގައި އިސްލާމީ މަރުކަޒުގެ 2 އިމާމުން ވަނީ ބައިވެރިވެވަޑައިގެންފައެވެ. އަދި މީގެ އިތުރުން ޑރ. ޝަހީމްގެ ކެމްޕެއިން ހަރަކާތްތަކުގެ ތެރެއިން އިމާމުންނާއި ބައްދަލުވެސް ކުރެއްވިއެވެ.
އިމާމުންނަށް ވަޒީފާގެ ބިރު ދައްކަމުންދާތީ އެކަމާއި ޢަދާލަތު ޕާޓީއިން ކަންބޮޑުވުން ފާޅުކޮށްފައިވާއިރު، ސިވިލް ސަރވިސްގެ އެހެން ދާއިރާތަކުގެ މުވައްޒަފުންނާއި، ސަރުކާރު ކުންފުނިތަކުގެ މުވައްޒަފުންނަށް ވަޒީފާގެ ބިރު ދައްކަމުންދާކަމުގެ އަޑުތައް ވަނީ ފެތުރިފައެވެ. ޚާއްސަކޮށް ވެރިކަންކުރާ ޕާޓީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ކެމްޕެއިން ހަރަކާތްތަކުގައި ބައިވެރިނުވާ މުވައްޒަފުންނާއި، އިދިކޮޅު ފަރާތްތަކުގެ ކެންޕެއިންގައި ހަރަކާތްތެރިވާ މުވައްޒަފުންނަށް ވަޒީފާގެ ބިރު ދައްކާ މައްސަލަ ވަނީ ބޮޑުވެފައެވެ.
