ރިޔާސީ އިންތިޚާބަކަށް މަހެއްހާ ދުވަހަށް ވެފައިވަނިކޮށް އަނެއްކާވެސް އިތުރު ޖޫރިމަނާއެއް މަޢާފްކުރުމަށް ސަރުކާރުން ނިންމައިފިއެވެ.
އެގޮތުން މިފަހަރު މަޢާފްކުރުމަށް ނިންމާފައިވަނީ ދިގު މުއްދަތަކުން އަގު އަދާކުރާ ގޮތަށް ފިޝަރީޒް މީނިސްޓްރީއިން ދޫކޮށްފައިވާ އިންޖީނުތަކާއި ދޯނިތަކުގެ ޖޫރިމަނާއެވެ. އެކަން އިއުލާންކުރައްވާފައިވަނީ ހުކުރު ދުވަހު ހެނދުނު ފިޝަރީޒް މިނިސްޓަރ ޑރ. މުޙައްމަދު ޝައިނީ ކުރެއްވި ޓްވީޓެއްގައެވެ. ޑރ. ޝައިނީ ވިދާޅުވީ ދިގު މުއްދަތަކުން އަގު އަދާކުރާ ގޮތަށް ފިޝަރީޒް މީނިސްޓްރީއިން ދޫކޮށްފައިވާ އިންޖީނުތަކާއި ދޯނިތަކުގެ ޖޫރިމަނާ ބަހާލައިގެން އެއް އަހަރާއި ދެ އަހަރާއި ދޭތެރޭ ފައިސާ ދައްކާ ޚަލާސްކުރާ ގޮތަށް އިތުރު ފުރުސަތެއް ދޭން ރައީސް ޔާމީން ނިންމަވައިފިކަމަށެވެ.
Dhigu mudhdhathun agu adha kura gothah @FishAgri kurin dhookoffa vaa engine adhi dhoni thakuge joorimana ma’aaf kohdhevva, bahailaigen 1-2 aharu therey faisa dhakka khalaas kurumah ithuru furusatheiy dheyn ogatheri Raeesuljumhooriyya nimmavaifi.#YameenShaheem2018
— Mohamed Shainee (@mshainee) August 17, 2018
ސަރުކާރުން މަޢާފްކޮށްދިނުމަށް ނިންމީ 1992 ވަނަ އަހަރުން ފެށިގެން 2002 ވަނަ އަހަރާއި ދެމެދު އޭރުގެ ސަރުކާރުން ދިގު މުއްދަތުގައި ފައިސާ ދައްކާ ޚަލާސްކުރާ ގޮތަށް ފިޝަރީޒް މިނިސްޓްރީއިން ދޫކޮށްފައިވާ ދޯނިތަކަށް ދައްކަން ޖެހޭ ފައިސާ ނުދައްކާ ފަރާތްތަކުން ފައިސާ ނުދައްކާތީ އަރާފައިވާ ޖޫރިމަނާއެވެ.
މިދޯނިތަކަށް ފައިސާ ނުދައްކާތީ ބައެއް ފަރާތްތަކުން ދޯނިތައް އަތުލުމުގެ މަސައްކަތް ކުރިއަށްދާކަމަށްވެސް 2016 ވަނަ އަހަރު ފިޝަރީޒް މިނިސްޓްރީއިން ހާމަކުރިއެވެ.
އިންތިޚާބާއި ދިމާކޮށް ސަރުކާރުން ޖޫރިމަނާތައް މަޢާފްކުރަމުން ދާތީ ބައެއް ފަރާތްތަކުން ވަނީ އެކަމާއި ކަންބޮޑުވުން ފާޅުކޮށް، އެއީ މަޤާމުންގެ ނުފޫޒު ނަހަމަ ގޮތުގައި ބޭނުންކުރުމުގެ އަމަލެއްކަމަށް ސިފަކޮށްފައެވެ.
