ކުރީގެ ރައީސް މައުމޫނު އަބްދުލްގައްޔޫމް އުމުރުފުޅުން 82 އަހަރުފުޅުގައި ނުހައްގުން ޖަލުގައި ބެހެއްޓުމަކީ ލަދުވެތިކަމެއް ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ރައީސް މައުމޫން ޖަލުގައި ހައްޔަރުކޮށްފައި ހުންނަވާތާ 180 ދުވަސްވުމާއި ގުޅިގެން ކަންބޮޑުވުންފާޅު ކުރައްވައި ގާސިމް ކުރެއްވި ޓްވީޓެއްގައި ވިދާޅުވީ, ރައީސް މައުމޫނަކީ ރާއްޖޭގެ ރައީސުލްޖުމްހޫރިއްޔާކަން 30 އަހަރު ކުރައްވާފައިވާ ބޭފުޅެއް ކަމަށާއި، ގައުމާ ރައްޔިތުންނަށް އެތަކެއް ޚިދުމަތް ކުރެއްވި ބޭފުޅެއް ކަމަށެވެ. މިފަދަ އެތަކެއް ޚިދުމަތްތަކެއް ކުރެއްވި ބޭފުޅަކު އުމުރުންފުޅުން 82 އަހަރުފުޅުގައި ނުހައްގުން ޖަލު ބަންދުގައި ހުރުމަކީ ލަދުވެތިކަމެއް ކަމަށް ގާސިމް ވިދާޅުވިއެވެ.
ރައީސް މައުމޫނުގެ ހިތްވަރަށް ޝުކުރު ދަންނަވާ ގާސިމް ވަނީ ސިޔާސީ ހައްޔަރީން ދޫކޮށްލުމަށް ސަރުކާރަށް ގޮވާލައްވާފައެވެ.
Raajjeyge Raeesuljumhooriyyaa kamuga 30 aharu qaumaa rayyithunnah khidhumaiy kurevvi Raees Al Usthaz Maumoon Abdul Qayyoom umurufulhun 82 aharuga nuhaqqun jalu bandhuga hurumakee ladhuvethi kameh. Raees Maumoonge hivvarah shukuru dhannavan. Siyaasee hayyareen minivan kuran jehey. pic.twitter.com/ZGFmtP6xxH
— Qasim Ibrahim (@qasimibrahim) August 5, 2018
އެކެއް ފެބްރުއަރީގައި ސްޕްރިމް ކޯޓުން ނެރުނު ކޯޓު އަމުރާއި ގުޅިގެން ކުއްލި ހާލަތު އިއުލާނުކޮށް ރައީސް މައުމޫން ހައްޔަރުކުރީ ފެބްރުއަރީ މަހުގެ ފަސް ވަނަ ދުވަހުގެ ރެއެވެ.
ފުލުހުންގެ ތަހުގީގަށް ފޯނު ދީފައި ނުވާކަމަށްބުނެ ދައުލަތުންކުރި އަދުލު އިންސާފު ގާއިމު ކުރުމަށް ހުރަސް އެޅުމުގެ ދައުވާ ސާބިތުވާކަމަށް ކަނޑައަޅައި އެމަނިކުފާނުގެ މައްޗަށް އެއް އަހަރާއި ހަތް މަހާއި ހަ ދުވަހަށް ޖަލަށްލުމަށް ކްރިމިނަލް ކޯޓުން ވަނީ ހުކުމް ކޮށްފައެވެ.
