ފިނޭންސް މިނިސްޓްރީ ކުރިމަތީގައި ތޫނު ހަތިޔާރުން ހަމަލާދީ ގ. ވޭރު އަބްދުލް މުހީތު (ބޮބީ) މެރިކަމަށް ސާބިތުވި ކުޑަކުއްޖަކަށްކޮށްފައިވާ ހުކުމެއްގެ އިސްތިއުނާފު އަޑުއެހުން ދޮޅު އަހަރު ދުވަހަށްފަހު، ސުޕްރީމް ކޯޓުގައި ފަށަން ނިންމައިފިއެވެ.
ބޮބީ މަރާލި މައްސަލާގައި ގަސްތުގައި މީހަކު މެރިކަން ސާބިތުވި ކުއްޖާ މެރުމަށް ޖުވެނައިލް ކޯޓުން ކުރި ހުކުމަށް ހައި ކޯޓުން ތާއިދުކޮށްފައި ވަނީ 2016 ވަނަ އަހަރުގެ ނޮވެމްބަރު މަހުގައެވެ.
މީގެ ހަ އަހަރު ކުރިން، 2012 ގައި ފިނޭންސް މިނިސްޓްރީ ކުރިމަތިން އޮންނަ ގޯޅި ތެރޭގައި ބޮބީއަށް ހަމަލާދީ މަރައިލި މައްސަލާގައި މަރަން ހުކުމް ކުރީ ދެ ކުޑަކުއްޖެކެވެ. ކުށް ކުރި އިރު ކުޑަކުދިން ކަމަށްވިޔަސް އެ މީހުންނަށް މިހާރު ވަނީ 18 އަހަރު ފުރިފައެވެ. އެ ދެ މީހުން މަރަން ހައި ކޯޓުން ވަކިވަކިން ކޮށްފައިވާ ދެ ހުކުމް ސުޕްރީމް ކޯޓުގައި އިސްތިއުނާފުކޮށްފައިވާއިރު، އިސްތިއުނާފު ޝަރީއަތް ފަށަނީ އެކެއްގެ މައްޗަށެވެ.
އެގޮތުން އޭގެ ތެރެއިން އެކެއްގެ މައްޗަށް ކުރާ އިސްތިއުނާފުގެ އަޑުއެހުންތައް ހޯމަ ދުވަހުގެ ހެނދުނު 10:30ގައި ފެށުމަށް ވަނީ ޝެޑިއުލްކޮށްފައެވެ.
ބޮބީ މަރާލިކަން ޝައްކެއް ނެތް މިންވަރަށް ސާބިތުވާތީ އެ މީހުން މަރަން ދަށު ޖުވެނައިލް ކޯޓުން ހުކުމްގައި ބުނެފައި ވަނީ އުމުރުން 18 އަހަރު ނުވިޔަސް ބާލިޣު ވެފައިވާ ނަމަ ކުށުގެ ޒިންމާ އުފުލަން ޖެހޭނެ ކަމަށެވެ. އުމުރުން 15 އަހަރު ވެފައިވާ ނަމަ އެއީ ބާލިޣުވެފައިވާ މީހެއް ކަމަށް ބެލެވޭނެ ކަމަށް އިސްލާމީ ޝަރީއަތުގައި އޮންނަ ކަމަށާއި ބޮބީ މަރައިލި އިރު އެ ދެ ކުދިންނަކީ 15 އަހަރު ފުރިފައި ތިބި ދެ މީހުން ކަމަށެވެ.
ބޮބީ މަރާލިކަން ސާބިތުވެ، ދެ ކުއްޖަކު މަރަން ޖެވެނައިލް ކޯޓުން ކުރި ހުކުމަކީ އެ ކޯޓުގެ ތާރީހުގައި ވެސް ފުރަތަމަ ފަހަރަށް އިއްވި މަރުގެ ހުކުމެވެ. ސުޕްރީމް ކޯޓުގައި އެ މައްސަލައިގެ އިސްތިއުނާފު އަޑުއެހުން ފަށާއިރު، އެއީ ކުޑަކުއްޖެއްގެ މައްޗަށް އިއްވި މަރުގެ ހުކުމަކަށް އެ ކޯޓުން ޝަރީއަތް ހިންގާ ފުރަތަމަ ފަހަރެވެ.
