އެޕްސްޓާރގެ އައު ސެޓެލައިޓް އެޕްސްޓާރ 6-C ލޯންޗު ކުރުމުގެ ރަސްމިއްޔާތުގައި ރާއްޖެޓީވީގެ ޗީފް ޓެކްނިކަލް އޮފިސަރ އިސްމާއިލް ޖިނާހު އާއި ހެޑް އޮފް ކޯޕަރޭޓް އެފެއާޒް އައިމިނަތު ރީޝާ ބައިވެރި ވެއްޖެއެވެ.

މި ސެޓެލައިޓް ލޯންޗިންގ އޭޕީޓީ ސެޓެލައިޓް ކޮމްޕެނީ ލިމިޓެޑްގެ ފަރާތުން ބާއްވާފައިވަނީ މެއި 3 ވަނަ ދުވަހު ޝީޗަން ސެޓެލައިޓް ލޯންޗު ސެންޓަރުގައެވެ.

އޭޕީޓީ ސެލެޓެލައިޓް ކުންފުނިން މި ސެޓެލައިޓް ލޯންޗު ކޮށްފައިވަނީ ލޯންގް މާރޗް  3B (CZ-3B) ނަމަކަށް ކިޔާ ތިން ސްޓޭޖް ހިމެނޭ ރޮކެޓެއްގައެވެ. އެ ރޮކެޓަކީ ޖީޓީއޯއަށް ސެޓެލައިޓް ލޯންޗު ކުރުމަށް ބޭނުންކުރާ ބޮޑު އެއްޗެކެވެ.

އެ ކުންފުނިން މިހާރު ވެސް ދަނީ ދުނިޔޭގެ އޯބިޓްގައި ހަތަރު ސެޓެލައިޓް ކަމަށްވާ އެޕްސްޓާރ 5، އެޕްސްޓާރ 6، އެޕްސްޓާރ 7 ގެ އިތުރުން އެޕްސްޓާރ 9 އެއްގެ ސެޓެލައިޓުތައް އޮޕަރޭޓް ކުރަމުންނެވެ.

އޭޕީޓީ ސެޓެލައިޓް ކުންފުންޏަކީ 1992 ވަނަ އަހަރު އުފައްދާފައިވާ ކުންފުންޏެކެވެ. އަދި އެ ކުންފުންޏަކީ އެންމެ ފުޅާ ދާއިރާ އެއްގައި އޭޝިއާ، ޔޫރަޕް އަދި މެދެއިރުމަތީގައި ހިދުމަތް ފޯރުކޮށްދެމުން އަންނަ ކުންފުންޏެކެވެ.