ކަލާޒް ޗެނަލްއިން ދައްކަމުން އައި ނާގިން ސީރީޒްގެ ތިން ވަނަ ސީޒަން އަންނަ ޖުލައި މަހުގެ 2 ވަނަ ދުވަހު ފެށުމަށް ނިންމައިފިއެވެ.

މި ސިލްސިލާގެ ފުރަތަމަ ދެ ސީޒަންގައި ވެސް ނާގިން ނުވަތަ ހަރުފައިގެ ރޯލު ކުޅެފައި ވަނީ މޯނީ ރޯއީ އާއި އަދާ ޚާންއެވެ. އެހެން ނަމަވެސް މޯނީ އާއި އަދާ ވަނީ މި ސީރީޒްގެ ތިން ވަނަ ސީޒަން ނުކުޅުމަށް ނިންމާފައެވެ.

ތިން ވަނަ ސީޒަނުން ފެނިގެންދާނެ ކަމަށް ކަށަވަރުވެފައިވާ ތަރިންނަކީ ސަންޖީދާ ޝޭޚްގެ އިތުރުން ކަރަންވީރު ބޮހްރާއެވެ. މިފަހަރު ނާގިންގެ ރޯލުން ފެންނާނެ ކަމަށް ޕްރޮޑިއުސަރ އެކްތާ ކަޕޫރު ބުނެފައިވަނީ ކަރިޝްމާ ތަންނާ އާއި ސީރީޒް "ޔޭ ހޭ މުހައްބަތޭން" އިން ފެނިގެންދިޔަ އަނީތާއެވެ.

"ނާގިން"ގެ ފުރަތަމަ ސީޒަން ދައްކަން ފެށީ 1 ނޮވެމްބަރު 2015 އިން 5 ޖޫން 2016 އަށެވެ. މި ސީޒަނުން ފެނިގެން ގޮސްފައި ވަނީ މޯނީ ރޯއި، އަރުޖުން ބިޖްލާނީ، އަދާ ޚާން އަދި ސުދާ ޗަންދްރަންއެވެ.

ދެވަނަ ސީޒަނުން ފެނިގެން ގޮސްފައި ވަނީ މޯނީ ރޯއި، ކަރަންވީރު ބޮހްރާ، ސުދާ ޗަންދްރަން، އަދާ ޚާން އަދި އާސްކާ ގޮރާޑިއާއެވެ. މި ސީޒަން ދައްކާފައި ވަނީ 2016 ވަނަ އަހަރުގެ އޮކްޓޯބަރު މަހުގެ 8 އިން މިދިޔަ އަހަރުގެ ޖޫން މަހުގެ 25އާ ހަމައަށެވެ.

ނާގިންގެ ދެ ސީޒަނުގައި ވެސް އިންޑިއާގައި އެންމެ މީހުން ބެލި ސީރީޒްއަށް ވަނީ ވެފައެވެ.

މި ސިލްސިލާ އަންނަނީ 2015 ވަނަ އަހަރުން ފެށިގެން ޓެލެވިޒަން ރޭޓިން ޕޮއިންޓްސް (ޓީއާރުޕީ) ގެ އެންމެ ކުރި ހޯދަމުންނެވެ. ތިންވަނަ ސީޒަން ނެރޭނީ މިއަހަރުގެ ތެރޭގައެވެ.