ޕެރޫގެ ރައީސް ޕެޑްރޯ ޕަބްލޯ ކުޒިންސްކީ މަގާމުން އިސްތިއުފާ ދެއްވުމަށް އެ ގައުމުގެ ގާނޫނުހަދާ މަޖިލީހަށް ހުށަހަޅުއްވައިފިއެވެ.
ކޮރަޕްޝަނުގެ ތުހުމަތުގައި މަގާމުން ވަކިކުރަން ހުށަހަޅަން ތައްޔާރުވެފައިވަނިކޮށް އިސްތިއުފާ އިއުލާނުކުރައްވާފައިވަނީ ޓީވީ މެދުވެރިކޮށް ބުދަ ދުވަހު ގައުމާ މުޚާތަބު ކުރައްވަމުންނެވެ.
އުމުރުފުޅުން 79 އަހަރު ފުޅުގެ ކުޒިންސްކީ އިސްތިއުފާ ހުށަހަޅުއްވާފައިވަނީ އެ މަނިކުފާނުގެ އިތުބާރުނެތްކަމުގެ ވޯޓެއް ނެގުމަށް ތައްޔާރުވުމުން އެ މަނިކުފާނުގެ އަރިސް ބޭފުޅުން މަޖިލީހުގެ މެމްބަރުންގެ ގާތުގައި އެ ވޯޓް ނުނެގުމަށް އެދިވަޑައިގެން ވާހަކަ ދައްކަވާ ކަމަށް ތުހުމަތުކުރެވޭ ވީޑިއޯތަކެއް ނަގާފައިވަނިކޮށެވެ.
ކުޒިންސްކީ ވަނީ ގާނޫނުއަސާސީގެ އުސޫލުތަކާއި އެއްގޮތަށް ވެރިކަމުގެ ބާރުތައް ހަވާލުކުރެއްވުމަށް ވައުދުވެ ވަޑައިގެންފައެވެ.
އެ މަނިކުފާނު ވަނީ ސުލްހަވެރި އެއްބައިވަންތަ ގައުމަކަށް ޕެރޫ ހެދުމަށް ކުރާ މަސައްކަތުގައި ހުރަހަކަށް ވެ ވަޑައިގަތުމަށް ބޭނުންފުޅުވެ ވަޑައިނުގަންނަވާ ކަމަށެވެ.
ޕެރޫގެ ގާނޫނު އަސާސީ ބުނާ ގޮތުން، ރައީސަކު މަގާމުން ވަކި ކުރުމަށް ގާނޫނު ހަދާ މަޖިލީހުގެ މެމްބަރުންގެ ތިން ބައިކުޅަ ދެބައިގެ އަޣުލަބިއްޔަތު ބޭނުންވެއެވެ. އެހެންކަމުން ކުޒިންސްކީ އެމަގާމުން ވަކި ކުރުމަށް ނަގާ ވޯޓުގައި 130 މެމްބަރުންގެ މައްޗަށް އެކުލެވޭ ގާނޫނު ހަދާ މަޖިލީހުގެ 87 މެމްބަރުންގެ ވޯޓު ހޯދަން ޖެހެއެވެ.
ކުޒިންސްކީގެ މައްޗަށް ކުރެވިފައި ވަނީ، ބްރެޒިލްގައި ކޮންސްޓްރަކްޝަންގެ ވިޔަފާރި ކުރާ ކުންފުންޏެއް ކަމަށްވާ އޮޑެބްރޭޗް އާއިއެކު ގާނޫނާއި ޚިލާފަށް، ސިއްރުން ފައިސާގެ މުއާމަލާތްތަކެއް ހިންގުމުގެ ތުހުމަތެވެ.
މިމައްސަލަ ފަޅާއަރާފައިވަނީ، 12 ގައުމަކުން އިމާރާތް ކުރުމުގެ ސިނާއަތާއި ގުޅުން ހުރި ކޮންޓްރެކްޓްތައް ހޯދުމަށް ރިޝްވަތުގެ ގޮތުގައި 788 މިލިއަން އެމެރިކާ ޑޮލަރަށް ވުރެ ބޮޑު އަދަދެއް ޚަރަދުކޮށްފައިވާ ކަމަށް އޮޑެބްރޭޗް އިން އެއްބަސްވުމާއި ގުޅިގެންނެވެ. ޕެރޫގެ އިތުރުން އެކުންފުނިން ރިޝްވަތު ދީފައިވާ ލެޓިން އެމެރިކާގެ ގައުމުތަކުގެ ތެރޭގައި އާޖެންޓީނާ، މެކްސިކޯ އަދި ވެނެޒުއޭލާ ހިމެނެއެވެ.
ކުޒިންސްކީ ވަނީ ގާނޫނާއި ޚިލާފަށް ފައިސާ ހޯއްދަވާފައިވާ ނުވާނެ ކަމަށް ވިދާޅުވެ، އިސްތިއުފާ ދެއްވުމަށް ދެކޮޅު ހައްދަވާފައެވެ. އެހެން ނަމަވެސް، އޮޑެބްރޭޗް ކުންފުންޏަށް ޚިދުމަތެއްގެ ގޮތުގައި ލަފާ ދީފައިވާނޭ ކަމަށް އޭނާ އެއްބަސްވެވަޑައިގެންނެވި އެވެ.
